SKÝRSLAN: Fagmannlegur sigur KA gegn ÍA
Hvað réði úrslitum?
KA liðið var betra í dag. Skagamenn áttu sína kafla og þá sérstaklega í síðari hálfleik, en heilt yfir var sigurinn fyllilega verðskuldaður. Heimamenn sköpuðu betri tækifæri og héldu mun betur í boltann.
Bestu leikmenn
1. Bjarni Aðalsteinsson (KA)
Skoraði sitt fyrsta mark í deildarkeppni fyrir KA og hélt uppá það með því að leggja upp annað. Var virkilega flottur á miðjunni, sívinnandi og öflugur í uppspili liðsins.
2. Steinþór Már Auðunsson (KA)
Varði í tvígang meistaralega í stöðunni 2-0 og þar með hélt KA yfirhöndinni. Þetta er alvöru markmaður.
Atvikið
Það var gaman fyrir KA fólk að sjá Jakob Snæ skora sitt fyrsta mark fyrir félagið eftir félagsskiptin frá nágrönnunum. Kláraði færi sitt vel og var vel fagnað af liðsfélögum og fólki í stúkunni.
Hvað þýða úrslitin?
KA menn eru í bullandi séns á að landa sæti í Evrópukeppni. Þrír leikir eftir, þar af tveir á heimavelli og innbyrðisviðureign gegn Val. Algjörir úrslitaleikir fyrir KA. Skagamenn eru í öllu verri málum á botni deildarinnar og munu vonast eftir hagstæðum úrslitum í leikjum HK og Fylkis í kvöld.
Vondur dagur
Árni Marinó gat lítið gert í fyrri tveimur mörkum KA, en hann er örugglega svekktur með að hafa ekki gert betur í þriðja marki heimamanna. Spyrnan var beint á hann og boltinn lak í gegnum hann. Jóhannes Karl var þó fljótur að koma honum til varnar og hrósaði markmanninum fyrir góða frammistöðu í sumar.
Dómarinn - 8
Elías dæmdi leikinn vel.