,,Við vorum bara heppnir að vinna í dag en vonandi er þetta meistaraheppni," sagði Arnar Gunnlaugsson við mig þegar ég spjallaði við hann eftir leik og það er spurning hvort sagan muni dæma úrslit leiksins þannig þegar talið verður upp úr kössunum í haust? FH var miklu betra liðið á vellinum og Víkingar lágu í skotgröfunum löngum stundum. Þeirra leikmenn kunna hinsvegar að skora mörk og það réði úrslitum í dag.

Þó svo það hafi ekki skipt neinu máli upp á úrslit leiksins þá var geggjað mark Björns Daníels Sverrissonar á 87. mínútu það sem allir eru að tala um eftir þennan leik. Kári Árnason keyrði Eggert Gunnþór Jónsson niður þegar hann var að skalla boltann og Vilhjálmur Alvar dómari hefur örugglega verið að fara að setja flautuna upp í sig til að dæma víti en boltinn barst til Björns sem tók hjólhestaspyrnu af miklu afli í markið. Geggjað mark.

Heimamenn í FH hafi ekki að neinu að keppa nema heiðurinn. Það eru ekki miklar líkur á að liðið hafi sætaskipti í síðustu leikjum mótsins, bara fastir í 6. sætinu. Fyrir Víkinga var þetta risasigur í komandi baráttu við Breiðablik og Val um Íslandsmeistaratitilinn. Það eru þrjár umferðir eftir og það að Víkingur sé enn í góðum séns á titli sýnir okkur hvað þetta er magnað lið.

Það er kannski erfitt að fara að setja hér leikmann sem enginn gerir væntingar til lengur. En Morten Beck er atvinnumaður, á háum launasamning á Íslandi. Það er í raun ofsalega dapurt að sjá frammistöðu hans inni á vellinum og gæðaleysið. Hvað varð um gæðin sem hann sýndi þegar hann skoraði 8 mörk í 8 leikjum með FH fyrir tveimur árum? Síðan þá hefur hann skorað 2 deildarmörk í 27 leikjum. Vinnan hans er að skora mörk.

Ekkert út á frammistöðu Vilhjálms Alvars að setja í dag og ég held að það hafi enginn verið að kvarta neitt undan honum.