SKÝRSLAN: KA kláraði Fylki í blálokin
Hvað réði úrslitum?
Einstaklingsgæði Hallgríms sáu til þess að KA komust yfir á 88. mínútu. Hann sigrar leiki uppá eigin spýtur og hefur sannað það margsinnis. Það leit út fyrir að leikurinn myndi renna út í sandinn og að markalaust yrði þegar flautað yrði til leiksloka. Stálmúsin frá Húsavík sá til þess að svo yrði ekki.
Bestu leikmenn
1. Hallgrímur Mar (KA)
Skoraði sigurmarkið gegn þéttri og baráttuglaðri Fylkisvörn.
2. Orri Hrafn Kjartansson (Fylkir)
Var mjög sprækur á boltanum og hefði átt að fá vítaspyrnu í upphafi leiks.
Atvikið
Þegar Helgi Mikael sleppti vítaspyrnu á KA í 9. mínútu. Dusan varðist Orra vel og kom honum úr jafnvægi, en Mark Gundelach mætti svo á blússandi siglingu í bakið á Orra og þetta virtist einfaldlega vera 100% víti.
Hvað þýða úrslitin?
KA menn eygja enn von um að spila í Evrópu á næsta tímabili og mæta Val á Hlíðarenda í næstu umferð. Það er enn einn stórleikurinn. Fylkir spila stærsta leik sumarsins þegar þeir fara á Skagann og etja kappi við ÍA. Aðeins eitt stig skilur liðin að í neðsta og næst neðsta sæti deildarinnar. Það er allt undir í botnbaráttunni.
Vondur dagur
Það er erfitt að segja til um það. Það vantaði töluvert upp á gæðin á síðasta þriðjungi vallarins hjá báðum liðum. KA menn komu sér í færi, sérstaklega í fyrri hálfleik, en var fyrirmunað að nýta þau. Þar til að Hallgrímur og Nökkvi höfðu stillt miðið! Fylkisliðið er ekki löðrandi í sjálfstrausti og sköpuðu sér ekki mikið, en áttu þó skot í stöng og vörðust virkilega vel.
Dómarinn - 6
Sleppti vítaspyrnu á KA í upphafi leiks og það hefði sannarlega getað breytt framvindu leiksins.