SKÝRSLAN: Íslandsmeistararnir úr leik
Hvað réði úrslitum?
Vestri þorði að spila sinn leik. Miðjumenn voru yfirvegaðir á boltann og þeir sóttu á mörgum mönnum. Ferðalagið vestur náði ekki að hrista Valsarana í gang sem voru frekar andlausir.
Bestu leikmenn
1. Pétur Bjarnason
Sennilega hægt að velja ellefu menn úr heimaliðinu, allir áttu toppdag. Set þetta á Pétur, hélt bolta afar vel á mikilvægum augnablikum, hljóp mikið og var mættur á báða enda vallarins til að hjálpa liðinu. Frábær snerting til að búa til sigurmarkið.
2. Chechu Meneses
Þeir félagar Elmar og Chechu voru með Patrick Pedersen algerlega í vasanum í dag. Hann stóð vaktina vel og auðvitað var mark hans úr aukaspyrnu ákaflega gott og mikilvægt.
Atvikið
Jöfnunarmark Vestra. Eftir að Valur komst yfir virtist þetta ætla að sigla þægilega í höfn fyrir gestina. Aukaspyrna Chechu kom rétt fyrir hlé og gaf heimamönnum trú fyrir seinni hálfleikinn.
Hvað þýða úrslitin?
Vestri eru komnir í fjögurra liða úrslit Mjólkurbikarsins! Evrópudraumar á koddanum í nótt hjá Samma. Valur er úr leik í bikarnum og von þeirra um Evrópukeppni er orðin ákaflega veik.
Vondur dagur
Patrick Pedersen var heillum horfinn í dag. Ógnaði sárasjaldan og kórónaði leik sinn með því að næla sér í rautt spjald undir lokin.
Dómarinn - 9
Rauða spjaldið var réttur dómur og komst vel frá öðrum minni atvikum.