Víkingar kveðja Lengjudeildina með sigri. En Grindavík tekur nú veturinn í uppbyggingu með nýjum þjálfara.

Viðtöl og skýrsla síðar í dag.

Þvílík björgun í tvígang!!!!!!!!

Víkingar sleppa í gegn og eru þrír gegn Aroni Degi en pollurinn með stórbrotinn varnarleik og stöðvar þá. Þeir fá annað tækifæri í teignum og ná skoti en pollurinn aftur með stórfenglega björgun og heimamenn sleppa.

Konráð með frábæra markvörslu eftir skot Andra Daða.

Kareem að reyna við þrennuna en pollurinn í teig Grindavíkur hefur betur í baráttu við hann um boltann.

Það er hætt að rigna í Grindavík sem gleður Ivan mjög.

Grindavík fær horn. Klafs í teignum eftir hornið en Grindvíkingar koma boltanum ekki á markið.

Zeba í fínu skalla færi eftir aukaspyrnu en boltinn framhjá.

Tiago með skot úr teignum en snýr boltann yfir markið.

Bjarni Þór með skot að marki Grindavíkur sem mér finnst Aron slá afturfyrir. Valdimar er ekki sammála og bendir til marks um markspyrnu.

Andri Daði með fína takta og gott skot sem Konráð ver í horn. Ekkert verður úr horninu.

Á síðustu 10-15 mínútum hefur boltinn líklega verið 7-8 mínútur að lágmarki utan vallar. Konráð markvörður gestanna er líklega farinn að fá tak í lærið miðað við fjölda markspyrna sem hann hefur tekið síðustu mínútur.

Ivan vallarstjóri horfir á leikinn hér með mér með tárvot augu. Þakkar fyrir að þetta sé síðasti leikur mótsins þar sem menn eru að spæna upp völlinn. Aðstæður sem flokkast sem hörmulegar.

Simon Logi að vinna sig í færi. Aðeins of gráðugur en Zeba í mun betra færi í teignum. Velur að skjóta og Konráð ver.

Hugsa að meginþorri leikmanna á vellinum hafi eytt góðum hluta síðari hálfleiks í að detta á rassinn. Völlurinn eins og skautasvell á köflum.

Víkingar í dauðafæri eftir skyndisókn. Willard finnur Bjart í hlaupi í teignum en flaggið á loft.

Setti boltann ekki á markið svo það breytti engu þegar allt er talið.

Grindvíkingar 3 á 1 í markteignum en Zeba velur versta kostinn og setur boltann beint í varnarmann.

Fátt annað en veðurfregnir sem ég get fært ykkur. Það rignir enn og bætt í ef eitthvað er.

Þetta er breytast í eitthvað grín hérna. Völlurinn svo blautur og þungur að menn komast vart úr sporunum og happa glappa hvert boltinn spýtist eða hvort hann snarstoppar í polli.

Seinni hálfleikur hafinn

Það eru heimamenn sem hefja leik hér í síðari hálfleik.

Valdimar er ekkert að bæta við þetta hér í fyrri hálfleik og flautar af. Gestirnir leiða með þremur mörkum gegn einu. Verið mun ákveðnari í sínum aðgerðum en hafa þó leikið undan vindi til þessa.

Ætla að fá að hrósa Víkingum fyrir sinn leik hér. Aðstæður vart boðlegar en þeir reyna að spila sinn bolta og hafa gert það með ágætum hingað til framarlega á vellinum. Vissulega ákveðið kæruleysi líka inn á milli varnarlega en heilt yfir bara nokkuð vel leikið hjá þeim.

Kareem Isiaka í færi á markteig en Viktor nær að trufla hann nægjanlega til þess að skota Isiaka verður slakt og beint á Aron.

Zeba í hörkufæri í teignum en vel fyrir innan þegar sendingin kemur og flaggið á loft.

Bjarni lætur vaða en Aron þarf ekki að hafa mikilar áhyggjur. Spyrnan hvergi nærri því að hitta á markið.

Gestirnir fá aukaspyrnu á fínum stað undan vindinum. Um að gera að láta vaða bara og reyna á Aron í markinu.

Aftur fá gestirnir hornspyrnu.

Þetta er að verða fjörugra í bleytunni í Grindavík. Fótboltinn ekki fallegur en þeim mun fyndnari eftir því sem völlurinn blotnar meira.

Laglegt spil Grindavíkur sem sækir upp hægri vænginn. Zeba og Tiago leika sín á milli sem endar með fyrirgjöf frá þeim síðarnefnda sem hittir beint á Símon í markteignum sem sneiðir boltann framhjá markinu.

Bjarni Þór Hafstein með skot eftir hornið en boltinn yfir markið.

Gestirnir fá horn.

Það er nú mest lítið að frétta hér úr Grindavík. Rignir enn og völlurinn vægast sagt erfiður.

Víkingar fá horn sem spyrna Bjarts döpur og heimamenn hreinsa.

Grindvíkingar í færi eftir lélega hreinsun úr teignum. Keke stingur sér til sunds og bjargar vel. Flaggið á loft í kjölfarið.

Kareem Isiaka í ágætu færi í teignum en setur boltann yfir markið.

Zeba og pollarnir eiga vel saman. Boltinn stöðvast í D-boganum og Zeba lætur vaða. Boltinn þó framhjá marki Víkinga.

Vallarhelmingur Grindavíkur er gegnsósa af vatni. Og í raun grátlegt að horfa upp á leikmenn reyna að fóta sig á vellinum við þessar aðstæður sem fara bara versnandi í þeirri úrhellisrigningu sem er.

Víkingar brjótast upp völlinn. Boltinn spýtist á rennblautu grasinu og menn eiga í basli með að hemja hann. Boltinn dettur þó á endanum fyrir fætur Willard hægra megin í teignum en hann nær ekki góðu valdi á boltanum sem fer afturfyrir endamörk.

Þetta er farið af stað hér í Grindavík. Valdimar Pálsson blæs til leiks.

Það er nóg um að vera hér á Fótbolta.net í dag. Mæli sérstaklega með að fólk fylgist með textalýsingum frá Njarðvík og Vesturbænum en á þessu völlum mun ráðast hvaða lið fylgir Þrótti Vogum upp í Lengjudeildina.

Fyrri viðureignir

Níu leiki hafa liðin leikið innbyrðis í B-deild frá aldamótum.

Grindavík 4 sigrar 17 mörk skoruð
Víkingur 3 sigrar 16 mörk skoruð
2 leikjum hefur lokið með jafntefli

Vonbrigðatímabil í Grindavík

Heimamenn settu markið hátt þetta sumarið og ætluðu sér að gera harða atlögu að því að fara upp um deild. EFtir frábæran sigur á liði ÍBV í fyrstu umferð fór að halla undan fæti og náði lægð Grindavíkur hámarki frá júnimánuði og langt inn í ágúst þar sem liðið vann ekki leik í rúma tvo mánuði þar af í fjölmörg skipti eftir að hafa fengið sigurmark í andlitið í uppbótartíma. Sigurbjörn Hreiðarsson lætur af störfum sem þjálfari Grindavíkur eftir tímabilið og er leikurinn í dag því hans kveðjuleikur.

Víkingar kveðja deildina

Ólafsvíkingar leika sinn síðasta leik í Lengjudeildinni í bili í dag. Það má með sanni segja að sumarið hafi verið langt og erfitt fyrir gestaliðið sem hóf leiktíðina undir stjórn Gunnars Einarssonar. Upp úr því samstarfi slitnaði um mitt sumar og gamalreyndur refur tók við Víkingum í annað sinn á jafn mörgum árum þegar Guðjón Þórðarson var ráðinn þjálfari. Sú breyting skilaði þó ekki þeim árangri sem vonast var eftir og fall varð ekki umflúið. Guðjón fær þó það verkefni að byggja liðið upp að nýju og freista þess að koma liðinu upp úr 2.deild að ári.

Lokaumferð Lengjudeildarinnar

Heil og sæl kæru lesendur og verið hjartanlega velkomin í beina textalýsingu Fótbolta.net frá leik Grindavíkur og Víkings.Ó í lokaumferð Lengjudeildar karla.