SKÝRSLAN: Betra en ekki nóg hjá Keflavík
Hvað réði úrslitum?
Valsmenn nýttu eitt færi en Keflavík ekki neitt. Það er það einfalt að öðru leiti var leikurinn jafn og baráttan í fyrirrúmi. Keflvíkingar geta þó tekið jákvæða frammistöðu út úr leiknum þótt stigin fari öll að Hlíðarenda.
Bestu leikmenn
1. Sebastian Hedlund
Það sem Keflavík bauð upp á fram á við stoppaði mjög oft hjá svíanum. Solid frammistaða.
2. Rúnar Þór Sigurgeirsson
Gaman að sjá Rúnar Þór aftur á vellinum og hann sýndi það í dag að hann er einn allra skemmtilegasti vinstri bakvörður landsins. Verður Keflavík gríðarlega mikilvægur þegar hann verður 100% á ný eftir aðgerð.
Atvikið
57. mín á klukkunni og Guy Smit breyttist í miðjumann, rak boltann frá eigin teig undir pressu nánast upp að miðjuboga þar sem hann tapaði boltanum til Frans Elvarssonar sem náði ekki að gera sér mat úr þessari gloríu Guy en máttlítið skot hans endaði hjá Hedlund.
Hvað þýða úrslitin?
Valur með 6 stig á toppi deildarinnar en Keflavík enn stigalaust við botninn.
Vondur dagur
Það er erfitt að tala um að einhver hafi átt vondan dag á vellinum eftir svona leik. En ef maður ætti að velja setur maður það á framherja liðanna sem hefðu vel þegið fleiri færi og stærri svæði að sækja í. En liðin voru bæði þétt og gáfu fá færi á sér.
Dómarinn - 6,75
Sigurður átti bara ágætis dag. Eitt og eitt smáatvik sem menn geta deilt um en stóru atriðin rétt og það skiptir mestu máli.