Gunnar Freyr flautar af og Arnar Sigþórs setur nýja FH lag Frikka Dórs í græjurnar, fallegt! FH er komið áfram. Skýrsla og viðtöl á leiðinni.

Fjórar í uppbót, FH-ingar eru á leiðnni í pottinn fyrir 16-liða úrslitin.

Boltinn lagður út á Finn Orra sem á skot en Dino ver í horn. FH-ingar ná lausum skalla að marki úr horninu sem Dino grípur.

Lennon með skot í varnarmann og boltinn rétt framhjá samskeytinum.

FH-ingar koma sér í enn eitt færið en yfir fer boltinn, sólin aðeins að blinda mig hérna í fréttamannastúkunni svo ég sá ekki hver átti skotið...

Björn Daníel í dauðafæri!! Fær boltann inná teignum en setur boltann beint í Dino, hefði átt að skora þarna...

Franz Bergmann með rosalega takta úti vinstra megin, klobbar Jóhann Ægi og fer inn á teiginn þar sem hann virtist ofpeppaður eftir klobbann og reynir skot á markið en bombar hátt yfir úr vel þröngu færi, hefði átt að rúlla boltanum fyrir markið þar sem Káramaður var mættur til að setja hann inn.

Ástbjörn sendir fyrir og Matti Vill stangar boltann framhjá!

Ástbjörn prjónar sig að teignum með boltann og lætur vaða með vinstri en yfir fer hann!

Hornspyrna frá FH alla leið yfir á fjær þar sem Matti er í boltanum en nær ekki að koma honum á markið.

Haraldur leggur boltann út á Lennon sem er með boltann á vinstri en neglir í varnarmann. Annað markið liggur í loftinu.

FH-ingar með gott spil upp völlinn, færa boltann frá hægri til vinstri sem endar með skoti frá Haraldir sem hittir ekki rammann.

Andri Júl fær boltann eftir innkast og fellur við fyrir framan teig FH-inga en ekkert dæmt við litla hrifningu Káramanna.

Logi Hrafn reynir skotið fyrir utan teig en Dino ver, Káramenn bruna svo fram, Atli Gunnar fær boltann frá Gumma Kri en fær pressu á sig og Andri Júl hálfri skóstærð frá því að ná að blokka hreinsunina sem fer í innkast, tæpt var það!

Baldur Logi upp að endamörkum og reynir fyrirgjöf sem fer í Káramann og í horn. Ekkert verður úr spyrnunni.

Aukaspyrna úti hægra megin sem Baldur Logi smellir fyrir og boltinn í síðuna á Vuk og Káramenn hreinsa.

Seinni farinn af stað!

Gunnar Freyr flautar til hálfleiks, possession svona 85% - 15% og hornspyrnur 11-0 en það er ekki spurt að því. 0-0 í mörkum og vonandi meira líf í seinni.

FH fær sína níundu hornspyrnu eftir að Oskar bjargar á fjær, tekið stutt og sent fyrir þaðan sem Káramenn setja í tíundu hornspyrnu FH... Vuk sendir fyrir og Gummi Kri hoppar en nær ekki skallanum í þetta sinn.

Logi Hrafn með skot fyrir utan teig sem Dino er í vandræðum með! Ver boltann fyrir fætur Lennon en er fljótur að mæta honum og loka.

FH-ingar mikið að þreyfa á Káramönnum hérna og hafa fengið nokkrar hornspyrnur en engin teljandi hætta skapast, fyrr en núna þegar Gummi Kri skallar yfir!

Haraldur með boltann fyrir beint á ennið á Oliver sem skallar beint á Dino!

Máni Austmann með fyrirgjöf sem Káramenn skalla í horn. Vuk tekur stutt núna og þeir spila boltanum alveg yfir hinumegin og þaðan kemur fyrirgjöf sem gestirnir skalla frá.

Önnur hornspyrna frá Vuk sem Káramenn skalla aftur til hans, hann keyrir inn á teiginn og hamrar á markið úr þröngu færi sem Dino ver, svo fer boltinn inn á teiginn aftur og Káramaður kixar boltann svo Logi fær gott skotfæri en í varnarmann.

FH-ingar fá hornspyrnu sem Vuk tekur. Gummi Kri skallar boltann yfir!

FÆRI! Vuk kemur boltanum inn á teiginn á Baldur Loga sem snýr og hamrar boltann rétt yfir samskeytin fjær...

Lið Kára er svona: 5-3-2 Dino Oskar, Ísak, Hafþór, Aron Snær, Finnbogi Arnar Már, Ingimar, Fylkir Nikulás, Andri Júl Teitur virðist ekki vera í byrjunarliðinu eins og skýrslan segir til um, mögulega meiðst í upphitun.

Lið FH er svona: 4-2-3-1 Atli Gunnar Ástbjörn, Jóhann, Gummi, Haraldur Logi Hrafn, Máni Austmann Oliver, Baldur Logi, Vuk Lennon

Aftur vinnur Haraldur boltann ofarlega úti vinstra megin og neglir fyrir en Ingimar Elí kemur boltanum í horn. Vuk sendir boltann fyrir en Káramenn skalla frá.

Fyrsta færið! Haraldur Einar vinnur boltann úti vinstra megin og sendir fyrir á Lennon sem hittir ekki boltann með vinstri... kjörið tækifæri.

Leikurinn er farinn af stað! Lennon sendir boltann niður á Loga Hrafn.

Liðin eru komin inn eftir upphitun og fólk er svona aðeins farið að týnast í stúkuna en ég myndi þó alveg vilja sjá talsvert fleiri, kannski er fólk að kyngja kvöldmatnum áður en það mætir.

Liðin eru komin út að hita, Bjössi Hreiðars gargar eftir tónlist upp í stúkuna og Arnar Sigþórs stekkur til og kippir því í lag.

Liðin eru komin inn hér til hliðar. FH-ingar hrista aðeins upp í liðinu hjá sér og koma Atli Gunnar og Jóhann Ægir meðal annars inn í liðið. Káramenn setja fram sterkt lið á sinn mælikvarða, Hafþór Péturs, Andri Júl, Teitur Péturs, Oskar Wasilewski og Ingimar Elí tildæmis þekktar stærðir innan herbúða þeirra.

Tenging félaganna er alls ekki mikil enda vafalaust lítill samgangur þarna á milli með leikmenn og annað, en hinsvegar er þjálfari Káramanna, Ásmundur Haraldsson fyrrum aðstoðarþjálfari FH-inga þar sem Ási var í teymi með Óla Kristjáns við stjórnvölin í Krikanum, svo Ási er að koma í heimsókn á sinn gamla heimavöll.

Eins og flestum er kunnugt leikur stórveldið úr Hafnarfirðinum í Bestu deildinni en Káramenn af Akranesi, venslalið ÍA leikur í 3. deildinni eftir að hafa fallið úr 2. deildinni síðasta sumar. Það má því klárlega segja að þetta sé leikur milli Davíðs og Golíat, hinsvegar hafa Káramenn tvisvar á seinustu fimm árum spilað bikarleik gegn liðum úr efstu deild, Reykjavíkur-Víkingum árið 2018 þar sem leikar stóðu 3-3 eftir venjulegan leiktíma en Víkingar kláruðu leikinn í framlengingu, 4-3. Svo spiluðu Káramenn gegn KR í fyrra þar sem Káramenn leiddu 1-0 allt þar til á 71 mínútu þegar KR jafnaði og skoraði svo sigurmarkið stuttu seinna, 2-1 sigur KR-inga. Svo það má með sanni segja að Káramenn séu sýnd veiði, en alls ekki gefin!

Góða kvöldið gott fólk og verið velkomin í þráðbeina textalýsingu frá leik FH og Kára í 32-liða úrslitum Mjólkurbikarsins.