SKÝRSLAN: Sólarsamba í Sambamýri!
Hvað réði úrslitum?
Fram heilt yfir sterkari aðilinn og átti sigurinn þannig séð skilið, en Leiknismenn gerðu vel í að koma til baka og sýndu góðan karakter. Það voru þó Framarar sem skoruðu fleiri mörk í dag og það telur.
Bestu leikmenn
1. Alexander Már Þorláksson (Fram)
Verð að hrósa Alla, skoraði gott mark, átti stóran þátt í sigurmarkinu, gríðarlega duglegur allan leikinn, klókur þegar mest á reyndi fyrir liðið og svo fær hann algjört extra kredit fyrir að hafa ekki bara spilað vel í sókninni í dag og verið hættulegur heldur leysti hann einnig hægri bakvörðinn af stakri prýði eftir að liðið lenti manni undir, alvöru liðs og karaktersframmistaða hjá Alexander í dag og mikilvægt að eiga mann sem leysir þau vandræði sem þjálfarinn biður hann að leysa.
2. Óskar Jónsson (Fram)
Mér fannst Óskar frábær á miðju Framara í dag, leggur upp gott mark fyrir Alexander og stýrði spilinu vel í gegnum völlinn. Hér má þó vel nefna Magnús Inga, Gunna Gunn, Þóri Guðjóns og fleiri sem voru hrikalega flottir í liði Fram í dag en Óskar fær nafnbótina.
Atvikið
Sigurmark Fram, Alexander geysist upp hægra megin úr bakverðinum, kemur boltanum á Tiago sem lyftir boltanum ansi huggulega inn á teiginn þar sem Jannik stangar boltann í netið, Leiknismenn verulega ósáttir með þetta mark og Siggi talaði um í viðtali eftir leik að það hafi verið kolólöglegt, ég ætla ekki að segja til um það en mikilvægt var markið og umdeilt í leiðinni miðað við upplifun Leiknismanna.
Hvað þýða úrslitin?
Fram verður í pottinum ásam Ægi, FH, KR og fleiri góðum liðum þegar dregið verður í 16-liða úrslitin á mánudaginn. Game over hjá Leiknismönnum þetta árið í bikarnum.
Vondur dagur
Mikkel Dahl var eitthvað tæpur fyrir leik, fær 2-3 sénsa til þess að skora mörk í leiknum áður en hann þarf að yfirgefa völlinn á 29. mínútu. Planið var víst að spila honum fyrri hálfleikinn en hann nær því ekki og því algjör vonbrigði.
Dómarinn - 8
Mér persónulega fannst tríóið rosa solid í dag og sá ekki margt að, leyfi þeim að njóta vafans með sigurmarkið sem Leiknismenn voru reiðir yfir, aðrir stórir dómar eins og víti og rautt á Alex Frey var spot on.