SKÝRSLAN: Efnilegasti leikmaður deildarinnar skilar sigri fyrir Gróttu
Hvað réði úrslitum?
Grótta var bara mun betra liðið í dag. Þeir voru þéttir fyrir og leyfðu lítið af færum svo voru þeir virkilega beittir í skyndisóknum og voru óheppnir að vinna ekki stærra.
Bestu leikmenn
1. Kjartan Kári Halldórsson (Grótta)
Nýkrýndur efnilegasti leikmaður deildarinnar var frábær í leiknum í dag. Hann skorar eina mark leiksins og skapar fullt af öðrum færum. Það mikilvægasta samt í hans leik í dag er hversu duglegur hann var varnarlega sem sést alls ekki það oft í svona ungum og hæfileikaríkum sóknarmanni.
2. Sigurjón Daði Harðarson (Fjölnir)
Sigurjón er ástæðan fyrir því að tapið var ekki stærra. Hann hélt Fjölni inn í leiknum lengi og átti 2 virkilega frábærar vörslur. Ekkert sem hann gat gert í markinu.
Atvikið
Það var ekki mikið um stór atvik í leiknum en mark Kjartans var vel tekið eftir góðan undirbúning frá Luke Rae.
Hvað þýða úrslitin?
Grótta fer upp fyrir Fjölni og eru því í 3. sæti þegar einn leikur er eftir. Fjölnir er í 4. sæti en hvorugt lið á möguleika á að fara upp um deild.
Vondur dagur
Sóknarleikur Fjölnis var ekki upp á marga fiska. Þeir virkuðu mjög hugmyndasnauðir og voru yfirleitt bara að reyna sömu fyrirgjafirnar trekk í trekk sem skilaði aldrei neinu.
Dómarinn - 9,5
Þorvaldur og hans teymi voru frábær í dag. Hann var að leyfa mönnum aðeins að pústa og ekkert að spjalda fyrir einhvern tittlingaskít. Eina ástæðan fyrir að hann fær ekki fullkomna 10 eru örfáir dómar sem ég var ekki alveg sammála einna helst gula spjaldið sem Kjartan fær fyrir dýfu sem mér sýndist frekar illa vegið að honum.