Risasigur ÍBV sem færir þá enn nær öruggu sæti að ári. Sex stig í fallsætið og 9 stig eftir í pottinum.

Hætta að skapast í teig ÍBV en boltinn þegar farinn og sigur ÍBV færist nær

Guðjón Pétur Stefánsson í dauðafæri eftir aukaspyrnu en Jón með stórbrotna markvörslu. Auk þess fer flaggið á loft og það hefði ekki talið.

Við fáum fjórar mínútur í uppbótartíma.

Rúnar Þór með stórhættulegan bolta frá vinstri yfir á fjærstöng en Jón Ingason kemur boltanum i horn

Rúnar neglir boltanum í markmannshornið en Jón ver boltann í horn.

Hornið tekið á nærstöngina þar sem að Magnús mætir en skallar boltann yfir markið.

Keflavík sækir. Brotið á Patrik alveg við D-bogann og gestirnir eiga aukaspyrnu á hættulegum stað.

Andri Rúnar dauðafrír eftir hornið en skallar boltann beint í fang Sindra.

Andri Rúnar hirðir boltann af kærulausum Dani Hatakka og keyrir í átt að marki. Lætur skotið ríða af en Sindri Kristinn ver vel í horn.

Andri Rúnar að skapa stórhættu í teig Keflavíkur en það vantar menn í boxið og færið rennur út í sandinn.

Elivs með skot að marki en boltinn víðsfjarri markrammanum

Eftir ágætar fyrstu 20 í hálfleiknum hjá Keflavík hefur hægst á leiknum og heimamenn náð betri takti í sinn leik og ekki hægt að segja að mark liggi í loftinu.

Andri Rúnar fíflar Magnús Þór algjörlega upp úr skónum og kemst í frábært færi. Skot hans ömurlegt og beint á Sindra. Svona færi eftir svona undirbúning á Andri Rúnar einfaldlega að klára.

Fyrsta verk Andra Rúnars er að sleppa einn í gegn. Sindri mætir vel út á móti og á Andri Rúnar vægast sagt lélega tilraun beint á Sindra. Vill reyndar meina að Sindri hafi verið fyrir utan teig þegar hann varði en það gat ég ekki séð.

Magnús með skallann eftir smá lotu eftir hornið en Jón ekki í vandræðum með að handsama boltann.

Keflvíkingar vinna boltann strax aftur og byggja upp á ný.

Keflavík á hornspyrnu.

Rúnar Þór skokkar á staðinn.

Jón Ingason með bjartsýnustu tilraun ársins. Reynir skot frá miðju eftir að hafa unnið boltann með góðri tæklingu. Sindri þakkar fyrir sendinguna og grípur boltann.

Það er hálftími eftir og lið ÍBV er sest rosalega neðarlega á völlinn.

Hættulegur leikur að leika og Keflavík að ganga á lagið.

Atli Hrafn með skot að marki en Sindri vel á verði og ver.

Kian Williams í hörkufæri í teig ÍBV en nær ekki nægjanlega góðu skoti og Jón ekki í teljandi vandræðum með að verja.

Keflavík með aukaspyrnu á ágætum stað.

Vörn ÍBV heldur og ekkert verður úr.

Patrik Johannesen með skot af vítateigslínu sem fer af varnarmanni og í fang Jóns. Gestirnir mun hressari fram á við en í fyrri hálfleik.

Seinni hálfleikur hafinn

Heimamenn rúlla þessu af stað. Í frábærri stöðu.

Sannngjörn staða á Hásteinsvelli heilt yfir. Keflvíkingar verið kraftlausir og lítið komist áfram gegn sterku og vel skipulögðu liði heimamanna. Komum aftur að vörum spori með síðari hálfleikinn.

Guðjón Ernir lá eftir á vellinum eftir að hafa fengið boltann í andlitið. Fljótur á fætur og leikur heldur áfram.

Fáum tvær mínútur í uppbótartíma.

ÍBV er að fá vítaspyrnu!

Sindri Snær brýtur á Arnari Breka að mati Vilhjáms. Virkar vafasamur dómur í sjónvarpi en Vilhjálmur var vel staðsettur.

Arnar Breki vinnur hornspyrnu fyrir heimamenn.

Sindri Kristinn slær boltann frá.

Jón er mættur á fætur og heldur áfram. Vonum það besta fyrir hann sem og ÍBV.

Jón Kristinn er sestur á völlinn og þarf aðhlynningu. Guðjón Orri meiddist fyrir leik og er ekki leikhæfur. Ef Jón getur ekki haldið áfram er staða Eyjamanna hvað markmenn varðar ekki góð.

Telmo með hörkuskot að marki eftir langt innkast frá hægri en boltinn í Magnús Þór og Keflvíkingar hreinsa.

Rúmur hálftími liðinn af leiknum og ekki annað hægt að segja en að forysta ÍBV sé sennilegast sanngjörn. Verið mikið hættulegri er þeir sækja og mun beinskeyttari.

Hætta í teig Keflavíkur. Aukaspyrna frá vinstri fer í Eið Aron í markteignum og stefnir að marki en Magnús Þór kemur boltanum í horn.

Sindri grípur boltann eftir hornið.

Patrik Johannesen með frábæra fyrirgjöf fyrir mark ÍBV frá hægri. Adam Ægir Pálsson mætir á réttum stað á réttum tíma en nær ekki að stýra boltanum á markið og fer skalli hans talsvert yfir.

Adam Ægir með glatað skot af 20 metrum sem flýgur hátt yfir markið

Adam Árni í dauðafæri í teig ÍBV en nær litlum krafti í skotið sem Jón gerir vel í að slá frá.

Dani Hatakka stálheppinn að sleppa við spjald þegar hjann keyrir Halldór Jón niður úti við hornfána.
Aukapyrnan fyrir markið fín en Sigurður Arnar nær ekki valdi á boltanum og gestirnir hreinsa.

Adam Ægir reynir skotið frá hægra vítateigshorn. Jón Kristinn ekki í vandræðum með það og handsamar boltann.

Eyjamenn geystast upp völlinn, Arnór Breki með boltann úti til vinstri leikur inn á teiginn og lætur bara vaða. Sindri ver en heldur ekki boltanum en nær völdum á honum í annari tilraun rétt áður en að Guðjón Ernir nær að gera sér mat úr frákastinu.

Eyjamenn verið mjög þéttir fyrir þessar fyrstu mínútur auk þess að hafa tekið forystu. Ekki gefið gestunum eina sekúndu án pressu á boltamanninn og unnið flesta seinni bolta.

Guðjón Orri er ekki í markinu hjá ÍBV og hefur sú breyting verið gerð á allra síðustu stundu. Við gerum því ráð fyrir að Jón Kristinn sé í rammanum.

Jæja þá getur þetta loks hafist á Hásteinsvelli. Það eru gestirnir sem hefja hér leik.

Sindri Kristinn Ólafsson er að vanda í marki Keflavíkur. Hann er orðaður við brottför frá Keflavík eftir tímabilið og eru KR og KA meðal liða sem munu vera á höttunum eftir starfskröftum hans.

Einhverjar tafir á því að leikur hefjist í Vestmannaeyjum. Herjólfi mun hafa seinkað og verður flautað til leiks klukkan 15:25

ÍBV vann 2 - 1 sigur á FH á miðvikudaginn var. Frá þeim leik gerir Hermann Hreiðarsson þjálfari liðsins gerir eina breytingu á liðinu. Guðjón Ernir Hrafnkelsson kemur til baka eftir að hafa tekið út leikbann og Felix Örn Friðriksson sest á bekkinn.

Keflavík vann 3 - 2 sigur á ÍA á heimavelli á sunnudaginn fyrir viku. Sigurður Ragnar Eyjólfsson þjálfari liðsins gerir tvær breytingar.

Joey Gibbs tekur út leikbann vegna fjögurra áminninga og Adam Árni Róbertsson byrjar í hans stað í framlínunni. Þá kemur Ásgeir Páll Magnússon inn fyrir Nacho Heras sem er ekki í leikmannahópnum vegna meiðsla.

Stefán Árni Pálsson þáttarstjórnandi Seinni Bylgjunnar á Stöð 2 Sport er spámaður umferðarinnar hjá okkur í þetta sinn. Um leikinn á Hásteinsvelli sagði hann.

ÍBV 0 - 3 Keflavík
Keflavík þekki það að spila í vindi og mun vinna þennan leik mjög sannfærandi. 3-0. Þeir eru algjörlega pressulausir og það muna skila sér í léttleikandi og flottri frammistöðu hjá Suðurnesjamönnum.

Hverjir skora? Jú, þrenna frá Adam Ægi Pálssyni.

Dómarinn og aðstoðarmenn hans

Vilhjálmur Alvar Þórarinsson blæs í flautunna á Hásteinsvelli í dag með þá Guðmund Inga Bjarnason og Antoníus Bjarka Halldórsson sér til halds og trausts. Arnar Þór Stefánsson er fjórði dómari og eftirlitsmaður KSÍ er Sigurður Hannesson.

ÍBV

Eyjamenn stigu risastórt skref í baráttunni við falldrauginn síðastliðinn miðvikudag þegar liðið bara sigurorð af liði FH 2-1 í Vestmannaeyjum og setti þar með fjögur stig á milli sín og fallsætis. Ekki má þó mikið út af bregða til þess að liðið sogist á ný í baráttuna við botninn og þurfa lærisveinar Hermanns Hreiðarssonar og bæta stigum á töfluna til þess að þurfa treysta eingöngu á sjálfa sig á lokasprettinum.

Keflavík

Stig í dag og Keflavík hefur gert út af við þann tölfræðilega möguleika (mjög hæpin þó) aö liðið falli. 12 stig skilja að Keflavík og FH sem situr í næst neðsta sæti og stærðfræðin ekki flókin þegar fjórir leikir eru eftir.

Markmið Keflvíkinga er að sögn Sigurðar Ragnars Eyjólfssonar að vinna alla leiki sem eftir eru og sýna þá sjálfum sér og öðrum að þeir ættu heima í efri hlutanum sem þeir börðust fram í síðustu umferð að ná sæti í.

Heil og sæl kæru lesendur og verið hjartanlega velkomin í beina textalýsingu Fótbolta.net frá leik ÍBV og Keflavíkur í neðri hluta Bestu deildar karla.