SKÝRSLAN: FH kláraði Keflavík á 10 mínútum
Hvað réði úrslitum?
FH-ingar kláruðu leikinn hreinlega á fyrstu 10 mínútunum. Þær mættu alveg óðar á meðan Keflvíkingar voru bara ekki á staðnum virtist vera. Þrátt fyrir að Keflavík hafi náð að spila sig aðeins inn í leikinn voru þær aldrei neitt sérstaklega líklegar til þess að snúa stöðunni sér í vil.
Bestu leikmenn
1. Arna Eiríksdóttir
Arna var fáránlega öflug í dag og gerði allt af mikilli yfirvegun. Var búin að gleyma að hún skoraði mark þegar ég valdi hana mann leiksins og það skemmdi nú ekki fyrir valinu. Gríðarlega solid frammistaða frá henni í dag og setur sitt fyrsta mark fyrir FImleikafélagið.
2. Shaina Faiena Ashouri
Shaina var, eins og Arna, gríðarlega öflug í dag. Það virtist alltaf vera hætta þegar hún fékk boltann og svo skoraði hún auðvitað mark númer 2. Hún hefði auðveldlega getað sett fleiri en hún þarf að sætta sig við eitt í dag.
Atvikið
Mark númer tvö frá FH kláraði þetta liggur við þrátt fyrir að það hafi komið á 8. mínútu. Auðvitað var fyrsta markið kjaftshögg en það er einhvern veginn auðveldara að setja undir sig hausinn og reyna að halda áfram í 1-0. En Keflvíkingar voru svo slegnir út af laginu eftir mark númer tvö að ég hef sjaldan séð annað eins og það er hreint út sagt ótrúlegt að FH hafi ekki verið allavega 4-0 yfir eftir fyrsta korterið.
Hvað þýða úrslitin?
FH-ingar sækja sinn fyrsta sigur og jafna stigafjölda Keflavíkur. Selfyssingar eru einnig með fjögur stig en þessi þrjú lið sitja í 7.-9. sæti í deildinni þegar að fjórar umferðir hafa verið spilaðar.
Vondur dagur
Varnarleikur Keflavíkur í upphafi leiks var alveg hrikalegur og eins og áður segir voru þær stálheppnar að vera bara 2-0 undir í hálfleik. Eins og áður segir náðu þær aðeins að vinna sig aftur inn í leikinn en það var bara of seint í rassinn gripið. Fæ líka að nefna veðrið en mér fannst bara ekkert fyndið hvað það var kalt í dag.
Dómarinn - 8
Helgi Ólafsson og hans teymi flottir í dag. Mér fannst hann leyfa leiknum að ganga og var ekki að falla í gryfjuna að dæma á litlar dýfur og slíkt.