SKÝRSLAN: Fyrirliðinn fauk út af í Laugardalnum
Hvað réði úrslitum?
Það er kannski ósanngjarnt að segja að Keflavík hafi haft heppnina með sér í dag en það var samt pínu þannig. Þær voru einhvernveginn ekki til neins líklegar þangað til að þær voru einum fleiri. En þær nýttu það vel og sigldu þessu heim. Þrátt fyrir að vera einum færri í 35 mínútur voru Þróttarar sprækir og hefðu í rauninni alveg getað tekið allavega eitt stig úr þessum leik.
Bestu leikmenn
1. Linli Tu
Linli sýndi í dag hvað hún er góð í fótbolta. Hún var að sleppa í gegn þegar Álfhildur braut af sér og svo kláraði hún aukaspyrnuna alveg fáránlega vel. Hún var svo að ná að halda vel í boltann þegar Keflavík þurfti á því að halda.
2. Katherine Amanda Cousins
Ég var í smá basli með að velja hver var næstbest í dag en endaði á Katie. Hún er bara að sýna það trekk í trekk að hún er top 3 besti leikmaðurinn í þessari deild. Hún var sérstaklega mikilvæg þegar Þróttarar voru einum færri en þá var hún mikið að fá boltann, halda í hann og taka menn á. Brynja Rán fannst mér líka koma virkilega sterk inn í lið Þróttar og Vera á líka skilið 'shout' en hún átti mikilvægar vörslur í dag sem hjálpuðu við að sigla sigrinum í höfn.
Atvikið
Rauða spjaldið breytti leiknum mikið. Fyrir það voru Þróttarar, að mér fannst, með alla stjórn á leiknum. Þær voru að koma sér í hættulegri færi og bara mun líklegri til að koma boltanum í netið. Fyrsta markið kemur svo beint úr aukaspyrnunni sem Keflavík fékk fyrir brotið hennar Álfhildar og þá voru Þróttarar allt í einu farnir að elta.
Hvað þýða úrslitin?
Þróttur situr áfram í 3. sæti með sín 13 stig á meðan Keflvíkingar fara úr 8. sæti upp í 7. sæti með 11 stig.
Vondur dagur
Álfhildur Rósa fær þetta. Hún fékk klaufalegt rautt spjald á 54. mínútu og þar fór þetta eiginlega fyrir Þróttarana í dag.
Dómarinn - 5
Ætla að gefa Guðmundi fimmu í dag. Ekki fall en ekki frábært. Rauða spjaldið var réttur dómur frá mínum bæjardyrum séð og ekki hægt að kvarta yfir því. Þróttarar vildu svo víti í stöðunni 0-1 þegar boltinn virtist fara í höndina á Anítu og vildu Þróttarar og fjölmiðlastúkan meina að um víti væri að ræða, undirrituð er þó ekki búin að sjá atvikið aftur og get því ekki sagt mína skoðun á því. Mér fannst Keflvíkingar síðan komast upp með allt of mikla töf og það er í raun ótrúlegt að Vera hafi komist inn í klefa eftir leik ekki með gult spjald.