SKÝRSLAN: Misstu toppsætið frá sér eftir að hafa heimsótt spútnikliðið
Hvað réði úrslitum?
FH byrjaði leikinn af krafti og tók forystuna snemma, en stuttu eftir það mark þá tók Breiðablik völdin á vellinum. Gestirnir fengu fjölda færa til að jafna metin og það tókst loksins seint í fyrri hálfleik. FH náði að núllstilla sig vel fyrir seinni hálfleik og baráttan var mikil síðustu 45 mínúturnar. Færin voru ekki mörg í seinni hálfleik og jafntefli niðurstaðan í þessum ágæta leik.
Bestu leikmenn
1. Aldís Guðlaugsdóttir (FH)
Var enn og aftur virkilega góð í marki FH-inga, stóð sína vakt gríðarlega vel. Er að koma til baka eftir höfuðhögg og átti mjög flottan leik. Er á sínu fyrsta tímabili í Bestu deildinni en er farin að gera tilkall í A-landsliðið.
2. Taylor Marie Ziemer (Breiðablik)
Stóð sig mjög vel á miðsvæðinu hjá Blikum, dreifði boltanum vel og sinnti varnarvinnuni sömuleiðis með ágætum.
Atvikið
Jöfnunarmark Breiðabliks kom seint í fyrri hálfleiknum. Á þeim tímapunkti leit út fyrir að Blikar væru aldrei að fara að skora, en það tókst loksins þarna.
Hvað þýða úrslitin?
Breiðablik var á toppnum fyrir daginn en er núna í öðru sæti eftir að Valur vann 1-7 sigur gegn ÍBV í Vestmannaeyjum. Þetta verður áhugaverð barátta áfram á milli Blika og Vals, en bæði lið eru að styrkja sig vel í glugganum. Spútniklið FH er í fjórða sæti með 21 stig og horfir upp á við.
Vondur dagur
Andrea Rut Bjarnadóttir og Agla María Albertsdóttir fengu svo sannarlega færi til að skora í þessum leik, en þær fundu sig ekki alveg. Færanýting Blika í fyrri hálfleik var alls ekki góð.
Dómarinn - 8
Flottur leikur hjá dómarateyminu, komust vel frá sínu.