Vestri nær að hanga á þessu og taka stigin þrjú!

Valdimar tekur sem fyrr. Hengir boltann á fjær, darraðadans í teignum og Selfyssingar við það að skora þegar Þórður blæs í flautuna. Markspyrna segir hann.

Þórður dæmir ódýra aukaspyrnu sem Guðmundur sækir. 20 metrum frá hægra megin á vellinum

Hornið er á Jón Vigni á miðjum teignum, einn og óvaldaður en nær ekki góðri snertingu, sneiðir boltann langt framhjá

Gary einn á einn, rennir boltanum á Aron Fannar sem er ferskur en Morten nær að komast fyrir á síðustu stundu

Hornið rennur út í sandinn. Gary brýtur af sér og sendir Þórði pillu.

Boltinn er hátt uppí loft og Rafa er í brasi en hann nær að slæma boltanum aftur fyrir. Annað horn.

Klaufagangur hjá Elvari og Morten

Þreyta komin í menn, leikurinn hefur dottið niður núna

Valdimar með frábæra fyrirgjöf frá vinstri sem Guðmundur Tyrfingsson rétt missir af

Silas reynir að keyra á Hrannar en hann hefur ekki komist lönd né strönd í leiknum. Bakvörðurinn ungi búinn að vera með hann í vasanum

Hreinsun fram endar hjá Gary í teignum, hann skýtur í fyrsta en mokar boltanum yfir!

Klafs á miðjunni, boltinn endar hjá Fatai sem brýtur miðjulínu Selfyssinga og lætur vaða á markið. Hittir boltann illa og framhjá fer hann

Silas kominn í hættulega stöðu upp við endamörk en fyrirgjöfin finnur ekki samherja.

Aukaspyrnan frá Valda skoppar rétt fyrir framan Rafa í markinu og hann heldur boltanum. Fín tilraun

Davíð Smári þarf að gera breytingar. Morten gjörsamlega urðar yfir liðsfélaga sína og skiljanlega. Ekkert að frétta.

Ákefðin í gestunum er að ná til Vestra. Þeir eru hættir að ná að tengja saman sendingar og eru á hælunum þessa stundina. Selfoss eru að ná að ýta þeim niður og leika sín á milli og eiga hættulegri sóknir.

Ibrahima Balde stígur á boltann og tapar honum á miðjunni. Bolti í fyrsta innfyrir á Gary sem á skot með vinstri sem rennur hárfínt framhjá stönginni á fjær.

Vestri er meira með boltann en það er meiri leikur og ákefð í gestunum. Hárfínt jafnvægi

Gary Martin leikur á mann á miðjunni, þræðir bolta innfyrir en örlítið fyrir framan Ingva sem missir af honum. Hættulegt.

25 metrum frá. Morten á hælunum, missir boltann framhjá sér og tekur því það næstbesta, manninn. Valdimar lætur vaða en laust yfir.

Ekkert kemur úr horninu til að skrifa um. Markspyrna

Fatai þræðir nálina í gegnum vörn Selfyssinga, Benó kominn í gott færi en flækir boltann milli fóta sér! Horn

Vestramenn með kvöldsólina í bakið hér í seinni hálfleik

Þetta er að detta í gang. Liðin komin út á völl

Frábærum fyrri hálfleik lokið. Selfyssingar létu plata sig í göngubolta í 25 mínútur en fá svo mark sem var ekkert annað en gæði frá Ingva og Gary og við það gjörbreytist leikur liðið. Byrja að öskra og hlaupa og veita heimamönnum leik. Stigin þrjú geta farið hvert sem er eða hvergi hér í seinni hálfleik.

ca 35 metrum frá hægra megin við miðju. Silas kemur boltanum inn í teig. Tufa rís hátt upp og skallar upp í loft en þá er Ibrahima Balde dæmdur brotlegur.

Valdimar með bolta á nær sem Gustav skallar frá í annað horn. Aftur á nær og aftur frá í horn. Boltin skoppar í teignum og Gary nær skoti sem Silas kemst fyrir. Þaðan fjarar sóknin út.

Kallar Jón Vigni til sín og segir honum eiginlega bara að grjóthalda kjafti svo öll stúkan heyrir, notar betri orð þó. Hrikalega nett.

Mikill hraði og tempó í þessu núna. Gestirnir sterkari ef eitthvað er. Frábær leikur!

Gustav Kjeldsen fer klaufalega í bakið á Ingva á hægri kantinum. Boltinn frá Valdimar er góður, vesen að hreinsa. Berst á Ingva sem á hörkuskot rétt framhjá markinu vinstra megin.

Það er hiti í þessu núna, meira að gera hjá Þórði á flautunni og Sammi geltir hátt í stúkunni.

Lyklaborðið ofhitnar! Orrahríð að marki gestanna, þrjár fyrirgjafir og hörkuskot frá Nacho sem varnarmaður kemst fyrir. Benó reynir að leika á Ívan sem stelur boltanum af honum. Selfoss komnir 4 á 3 en Gary Martin missir boltann upp í hendina á sér.

Þetta stefndi í þægilegan dag á skrifstofunni fyrir heimamenn en eitt mark getur breytt svo miklu í fótbolta. Allt annar leikur núna.

Aukaspyrna á miðjunni inn á teiginn, finnur Hrannar einn og óvaldaðann en skalli hans er rétt framhjá markinu. Skjótt skipast veður í lofti!

Valdimar kemur með djúpann bolta á fjær sem Rafael kýlir í burtu og ekkert kemur í framhaldinu. Jæja þetta er allavega eitthvað.

Gestirnir fá aukaspyrnu á vinstri vængnum í ágætri stöðu.

Selfyssingar komast ekki á boltann, eru hreinlega fjarverandi hérna. Vestramenn spila sín á milli og leita að glufum og gestirnir komast ekki nálægt þeim.

Fatai tapar boltanum undir engri pressu á miðjunni, fyrirgjöf frá hægri sem Valdimar rétt missir af á fjærstönginni.

Vestramenn með ágætis spil, boltinn ratar til Elmars í fyrirgjafarstöðu en auðvelt fyrir Stefán í markinu

Þetta fer rólega af stað, menn eru að fóta sig en völlurinn er mjög hraður, búið að bleyta vel í honum og slá niður.

Vestfjarðaóður með kónginum sjálfum Herberti Guðmundssyni ómar í græjunum hér á vellinum og liðin eru að gera sig klár að rölta út á völlinn. Kallinn gerði allt vitlaust á Vagninum á Flateyri á helginni.

Það gleður okkur ísfirðinga að sjá Þorlák Breka Baxter í byrjunarliði Selfyssinga, en hann er barnabarn nafna síns, sem er goðsögn í skíðaíþróttinni hér í bæ.

Gef alltaf dómaranum shout hérna og engin undantekning í dag. Skagamaðurinn Þórður Þorsteinn Þórðarson er á flautunni í dag. Ungur og efnilegur dómari sem lagði leikmannaskónum snemma til þess að taka dómgæsluna alvarlega. Þurfum fleiri svona gæja í íslenskan fótbolta.

Nýju mennirnir hjá Vestra eru á bekknum, þeir Tarik Ibrahimagic og Iker Hernandez Ezquerro. Ibrahimagic byrjaði á móti Grindavík í síðustu umferð en Ibrahima Balde leysir hann af í byrjunarliðinu í dag. Oskar Wasilevski er fjarverandi í dag en Þorsteinn Aron Antonsson tekur sæti hans í byrjunarliðinu hjá Selfyssingum. Að öðru leyti óbreytt lið úr 3-1 sigrinum á Ægi í síðustu umferð.

Eins og sést á stöðunni í deildinni er leikurinn gríðarlega mikilvægur fyrir bæði lið. Sigur í þessum leik festir liðið í sessi í baráttunni um sæti í úrslitakeppninni sem svo mörg lið í deildinni berjast um. Deildin er gríðarlega jöfn, aðeins 6 stig skilja að Njarðvík í fallsætinu og Gróttu sem er í augnablikinu í síðasta sætinu sem tryggir þáttökurétt í umspili um sæti í Bestu deildinni.

Afturelding 36 stig - Fjölnir 29 stig ÍA 27 stig Leiknir R 23 stig Grótta 20 stig - Vestri 20 stig Selfoss 19 stig Þór Ak 17 stig Grindavík 16 stig Þróttur R 15 stig - Njarðvík 14 stig Ægir 8 stig

Góðan daginn og verið velkomin í beina textalýsingu frá leik Vestra og Selfoss í lengjudeild karla.