Allt klárt og styttist í leik.
Liðin eru að ganga til vallar og ekkert að vanbúnaði til þess að hefja hér leik.

Vonumst að sjálfsögðu eftir skemmtilegum og spennandi leik.

Liðin mætt í hús Heimamenn í Keflavík gera fjórar breytingar frá tapinu gegn Fram. Ásgeir Orri Magnússon stendur í markinu fyrir Mathias Rosenörn. Þá fara Magnús Þór Magnússon, Sindri Þór Guðmunddson og Ísak Daði Ívarsson allir á bekkinn. Inn í þeirra stað koma Gunnlaugur Fannar Guðmundsson, Stefan Ljubici og Edon Osmani.

Fylkismenn gera sömuleiðis breytingar á liði sínu frá 2-2 jafnteflinu gegn HK. Þóroddur Víkingsson Emil Ásmundsson og Sveinn Gísli Þorkelsson eru ekki með í dag. Inn í þeirra stað koma Ásgeir Eyþórsson, Pétur Bjarnason og Elís Rafn Björnsson

96 leikir í efstu deild á bakvið flautuna Þórður Þorsteinn Þórðarson fyrrum leikmaður ÍA,FH og HK dæmir sinn fyrsta leik í Bestu deildinni í dag. Uppgangur Þórðar í dómgæslu hefur svo sannarlega verið nokkuð hraður en Þórður sem lék síðast í efstu deild 2021 sagði í viðtalið við Fótbolta.net í upphafi tímabils í fyrra.

„Í dómgæslunni ætla ég að vera alla leið inn og ég stefni á að vera búinn að dæma leik í efstu deild fyrir lok næsta tímabils. Það er mitt markmið og ég gef það alveg beint út. Ég veit að ég get komist eins langt og ég vil í þessu."

Það má því segja að Þórður hafi staðið við stóru orðin.

Þórði til aðstoðar í dag eru Guðmundur Ingi Bjarnason og Patrik Freyr Guðmundsson. Gunnar Oddur Hafliðason er fjórði dómari og eftirlitsmaður KSÍ sjálfur Gylfi Orrason.

   16.05.2022 14:56

„Stefni á að vera búinn að dæma leik í efstu deild fyrir lok næsta tímabils"

Fyrri viðureignir á tímabilinu
Fylkir er annað af tveimur liðum deildarinnar sem Keflavík hefur unnið þetta tímabilið. Sá sigur kom í fyrstu umferð þann 10.apríl síðastliðin þegar Keflavík bar 2-1 sigur úr býtum.

Benedikt Daríus Garðarsson kom þar Fylki yfir með marki úr vítaspyrnu eftir hálftíma leik. Sami Kamel jafnaði svo metin fyrir Keflavík á 74. mínútu leiksins áður en að Dagur Ingi Valsson tryggði Keflavík 2-1 sigur með marki í uppbótartíma.

Síðari leik liðanna lauk svo með 1-1 jafntefli þar sem að Pétur Bjarnason og Edon Osmani gerðu mörk sinna liða.

Keflavík
Fallið hefur lengi hangið yfir Keflavík þetta sumarið en varð loks staðfest eftir tap þeirra gegn Fram á dögunum. Aðeins tveir sigrar í 25 leikjum er bara langt frá því að vera nóg þótt níu jafntefli hafi vissulega gefið þeim ákveðna líflínu lengi vel þá dugir það einfaldlega ekki.

Tímabil Keflavíkur hefur því miður verið harmsaga á köflum á að horfa. Lykilmenn hafa verið mikið frá vegna meiðsla sem gerði liðinu mjög erfitt fyrir enda breiddin í hópnum ekki sú mesta eins og hefur sýnt sig. Framundan hjá Keflavík er því uppbygging á ný í Lengjudeildinni að ári en fyrst þó tveir leikir upp á stoltið. Sá fyrr í dag, síðasti heimaleikurinn í bili í Bestu deildinni.

Fylkir
Gestirnir úr Árbæ eru fyrir leik dagsins í fallhættu þó þeir standi vissulega betur að vígi en lið ÍBV sem mætir HK í Vestmannaeyjum síðar í dag. Það er sannarlega stutt á milli í baráttu Fylkismanna sem gætu tryggt sæti sitt í dag með sigri að því gefnu að HK taki stig af ÍBV. Að sama skapi gæti liðið endað daginn í fallsæti tapi þeir og ÍBV vinnur.

Varnarleikurinn hefur verið mesti hausverkur Fylkismanna þetta sumarið en 53 mörk fengin á sig er það mesta í deildinni, vafasamur heiður sem þeir deila með liði HK. Fyrsta hugsun Fylkismanna fyrir leikina sem eftir eru hlýtur því að vera að múra fyrir markið og freista þess að stoppa í götin þar sem hafa reynst þeim dýr í sumar.

Fer að líða að lokum í Bestu deildinni
Heil og sæl kæru lesendur og verið velkomin líkt og alltaf í þessu beinu textalýsingu Fótbolta.net frá leik Keflavíkur og Fylkis í næst síðustu umferð Bestu deildar karla. Flautað verður til leiks á HS Orkuvellinum klukkan 14.