Ragnar Sigurðsson þjálfari Fram gerir eina breytingu á sínu liði frá sigrinum gegn Keflavík. Aron Jóhannsson kemur inn í byrjunarliðið í stað Jannik Pohl.

Hallgrímur Jónasson þjálfari KA gerir fjórar breytingar frá sigrinum gegn ÍBV. Ívar Örn Árnason, Joan Símun Edmundsson, Andri Fannar Stefánsson og Harley Willard fara út og í stað þeirra koma inn Bjarni Aðalsteinsson, Valdimar Logi Sævarsson, Daníel Hafsteinsson og Ásgeir Sigurgeirsson

Fram Fram er auðvitað í mjög svo harkalegri botnbaráttu en neðri hlutinn hefur gengið vel og lærisveinar Ragnars Sigurðarsson eru ennþá taplausir og sigur gegn Keflavík í seinustu umferð gerir það að verkum að staðan lítur mun betur út en áður. Liðið er 3 stigum frá falli og sigur í dag myndi svo gott sem tryggja liðinu sæti í Bestu deildinni að ári. Mótherjinn er þó sterkur og þeir munu þurfa að hafa fyrir sigrinum.

KA Vonbrigðin hjá KA að vera í neðri hlutanum hljóta að vera mikil og þá sérstaklega eftir að liðið tapaði bikarúrslitaleiknum þann 16. september fyrir Víkingi. Maður verður þó að gefa þeim hrós. Mörg lið hefðu mætt inn í þessa leiki með hálfum hug og mögulega tapað óþarfa leikjum en það er ekki hægt að segja það um KA. Liðið hefur mætt inn í þessa leiki og sýnt öllum sem vilja sjá að þetta lið er alltof gott fyrir neðra hlutann. Forsetabikarinn er í höfn!