SKÝRSLAN: Lífið er leikur í Lautinni
Hvað réði úrslitum?
Þegar öllu er á botninn hvolft er líklega hægt að segja baráttugleði Fylkiskvenna sem tryggðu sér gott stig á ögurstundu. Heilt yfir átti Þróttur líklega fleiri og hættulegri færi en heimakonur héldu alltaf áfram og börðust eins og grenjandi ljón og uppskáru eftir því.
Bestu leikmenn
1. Caroline Murray
Skapaði ansi marga sénsa fyrir liðsfélaga sína af vinstri vængnum í dag. Færi sem á öðrum degi hefðu gefið fleiri mörk. Það er gallinn við færin, þegar búið er að skapa færið þarf einhver annar að nýta það.
2. Eva Rut Ásþórsdóttir
Kraftur og áræðni. Óheppinn að skora ekki þegar hún átti bylmingsskot í slá í fyrri hálfleik. Reis hæst í teignum og lagði upp jöfnunarmark Fylkis.
Atvikið
Hér verð ég að minnast á umgjörð Fylkis. Skrúðganga fyrir leik, trúbador í stúkunni fyrir leik. Hamborgarar sem seldust upp. Viktor Lekve í essinu sínu sem vallarþulur og umfram allt gríðarlega jákvæðni á bakvið allt í umgjörð leiksins. Umgjörð sem mörg önnur lið mættu horfa til og heimfæra á sína velli. Takk fyrir mig Fylkir.
Hvað þýða úrslitin?
Bæði lið með sitt fyrsta stig þetta sumarið. Þarf það að vera eitthvað flóknara?
Vondur dagur
Átti einhver vondan dag á Wurth í kvöld? Erfitt að segja það þannig en Sierra Marie Lelii fékk nokkur álitleg færi sem hún fór illa með í þetta skiptið. Framherjar eru dæmdir af mörkum og þegar það er ekki að detta þá er auðvelt að benda á þá.
Dómarinn - 7
Teymið átti bara fínasta kvöld líkt og flestir aðrir. Man ekki til þess í fljótu bragði að þar hafi verið einhverjar gloríur. Enda var alltof gaman hjá mér til að vera að pæla í því.