Íslenska liðið sigrar Austurríki hér á heimavelli með tveimur mörkum gegn einu! Virkilega vel gert hjá Íslenska liðinu sem hefðu hæglega getað bætt í en við tökum þessum þremur stigum fagnandi!

Íslenska liðið er að sigla þessum sigri heim!

Fáum +4 í uppbót

Íslenska liðið að komast í frábæra stöðu en ná ekki að klára með skoti.

Íslenska liðið nálægt því að finna Söndru Maríu Jessen á bakvið vörn Austurríkis en Jasmin Pal gerir vel að koma út úr markinu og handsama boltann.

Sveindís með skemmtilega takta og læðir boltanum á bakvið vörn Austurríkis á Hildi Antonsdóttur sem reynir svo að koma boltanum fyrir markið en boltinn fellur svo fyrir Sveindísi sem á skot yfir markið.

Verena Hanshaw með flottan bolta fyrir markið en Julia Hickelsberger nær ekki að skalla að marki og boltinn fer framhjá.

Langt innkast og boltinn virðist vera detta fyrir Karólínu Leu sem er að hlaða í skot en Austurríska liðið nær að hendast fyrir og Karólína Lea svo dæmd brotleg.

Lilli Purtscheller fær boltann og reynir skot sem fer yfir markið.

Selma Sól með tilraun af smá færi en Jasmin Pal tekur það.

Íslenska liðið með hornspyrnu.. Hvað býður Karólína Lea okkur uppá núna?

Sveindís með langt innkast og það myndast kraðak inni á teignum en Austurríska liðið nær því miður að koma boltanum frá! Íslenska liðið er að hóta marki!

Karólína Lea með flotta hornspyrnu sem endar með skalla á markið. Íslenska liðið hendir sér á eftir öllum boltum og ég sá ekki hver það var sem lá eftir en Íslenska liðið gerði tilkall til vítaspyrnu. Hefði alveg mátt benda á punktinn þarna en ég er vissulega kannski ekki hlutlaus í þessu máli..

Sveindís með frábæran sprett og kemur inn á teiginn þar sem hún leggur boltann út á Hlín Eiríks en Jasmin Pal með frábæra vörslu!

Langt innkast frá Sveindísi fellur fyrir Hildi Antonsdóttur en nær ekki að framlengja á rammann.

Austurríska liðið ræður ekkert við Sveindísi þegar hún kemst á ferðina. Sarah Zadrazil heppin að sleppa við spjaldið þarna.

Aftur er það stöngin sem bjargar Austurríska liðinu frá hornspyrnu Karólínu Leu!! Hornspyrnurnar frá Karólínu Leu verið stórhættulegar hérna í seinni hálfleik!

Sveindís með skot rétt framhjá!! Nýttum okkur vissulega vindinn þarna og Sveindís kemst á ferðina. Marina Georgieva á í fullu fangið með að reyna halda í við hana áður en Sveindís skaut á markið.

Íslenska liðið með vindinn í bakið í seinni. Vonandi náum við að nýta okkur það.

Hornspyrnan frá Karólínu Leu fer beint í stöngina á fjær!

Sveindís vinnur fyrstu hornspyrnu seinni hálfleiksins.

Austurríska liðið sparkar okkur af stað aftur.

Austurríki jafnar rétt fyrir hlé og liðin fara jöfn til búningsklefa. Íslenska liðið verið betra að mínu mati í fyrri hálfleik svo vonandi halda þær bara áfram í seinni og bæta við! Tökum okkur stutta pásu og snúum aftur með seinni eftir örskamma.

Sveindís gerir virkilega vel að vinna boltann upp við miðlínu og keyra af stað. Reynir svo að koma boltanum til Karólínu Leu en Jasmin Pal gerir vel að koma út á móti.

Verena Hanshaw reynir skot af löngu færi en Fanney Inga ekki í neinum vandræðum með það.

Marina Georgieva að komast í álitlega stöðu en Íslenska liðið nær að henda sér fyrir skotið hennar.

Austurríki með hornspyrnu sem Virginia Kirchberger nær að koma kollinum í en framhjá markinu.

Flott sóknarlota frá Íslenska liðinu en Austurríska liðið nær að vera fyrir. Íslenska liðið verið virkilega baráttuglatt framarlega á vellinum.

Austurríska liðið með flotta takta fremst en fyrirgjöfin of innarlega og fer aftur fyrir.

Virginia Kirchberger rennir sér í teignum og tekur Sveindísi niður en dómarinn fljót að gefa merki um að halda áfram.

Fanney Inga með vörslu áður en flaggið fór svo á loft.

Austurríska liðið aðeins að ógna í hornum en Fanney Inga stendur vaktina vel.

Austurríska liðið reyndi að nota vindinn til að svara strax en blessunarlega gekk það ekki eftir.

Lilli Purtscheller með skot sem Fanney Inga grípur.

Eileen Campbell ekki langt frá því að komast í boltann með opið mark fyrir framan sig en Fanney Inga gerir vel og sparkar frá.

Karólína Lea með flotta aukaspyrnu inn á teig sem Glódís Perla skallar fyrir markið en flaggið á loft.

Sarah Zadrazil með fyrirgjöf sem fýkur í átt að marki og lendir ofan á slánni og verður þar óvænt tilraun á markið.

Vindurinn ekki að gera okkur neina greiða og aukaspyrnan fýkur bara úr teignum.

Island fær aukaspyrnu á góðum stað úti hægra meginn. Gott færi fyrir Karólínu Leu að senda fyrir.

Austurríki í brasi með að hreinsa frá marki og Ísland ógnar en fáum dæmt á okkur hendi.

Ísland fær fyrstu hornspyrnu leiksins.

Smá bras aftast og Fanney Inga með vafasamt útspark en sleppur til.

Sveindís sparkar þessu af stað! ÁFRAM ÍSLAND!

Halla Tómasdóttir, nýkjörinn forseti Íslands, er auðvitað mætt í heiðursstúkuna ásamt eiginmanni sínum. Hún situr við hlið Guðna Th., sem lætur af embætti í byrjun ágúst.

Það var stemning á Fan Zone-inu!

Ein breyting frá síðasta leik. Jasmin Pal byrjar í markinu í stað Manuela Zinsberger sem er að eignast barn með eiginkonu sinni. 23. Jasmin Pal (m) - Köln 6. Katharina Schiechtl - Austria Vín 8. Barbara Dunst - Eintracht Frankfurt 9. Sarah Zadrazil - Bayern München 11. Marina Georgieva - Fiorentina 13. Virginia Kirchberger - Eintracht Frankfurt 14. Marie Höbinger - Liverpool 17. Sarah Puntigam - Houston Dash 19. Verena Hanshaw - Eintracht Frankfurt 20. Lilli Purtscheller - SGS Essen 22. Eileen Campbell - Freiburg

Núna gleymdist ekki að skrá neinn og eru 23 leikmenn í hópnum: Hann er fullskipaður.

Þorsteinn Halldórsson, landsliðsþjálfari Íslands, gerir tvær breytingar á liði sínu fyrir leikinn gegn Austurríki í undankeppni EM 2025 í kvöld. Leikið er á Laugardalsvelli. Selma Sól Magnúsdóttir, sem var utan hóps vegna mistaka starfsmanns KSÍ í síðasta leik, kemur inn í byrjunarliðið fyrir Alexöndru Jóhannsdóttur. Hlín Eiríksdóttur kemur einnig inn í liðið fyrir Diljá Ýr Zomers.

Désirée Grundbacher er með flautuna í kvöld. Hún er frá Sviss eins og allt dómarateymið. Susann Küng og Linda Schmid eru aðstóðardómarar og Stefan Horisberger er fjórði dómari.

Fram kemur á vef Morgunblaðsins að um 2100 miðar hafi verið seldir á leikinn. Vonumst til að sjá enn fleiri en það í Laugardalnum í kvöld.

Það virðist hafa tekist að skrá Selmu Sól og Kristínu Dís í hópinn að þessu sinni. Þær eru allavega báðar skráð í hópinn á vef UEFA.

View this post on Instagram

A post shared by Knattspyrnusamband Íslands (@footballiceland)

Það er búist við sjö stiga hita og tólf metrum á sekúndu þegar leikurinn fer fram í kvöld. Liðið er ekkert að stressa sig á veðrinu. „Ég hef verið mjög rólegur yfir veðrinu og ekkert kíkt á veðurspánna. Það er verið að tala um einhverjar gular viðvaranir og eitthvað svoleiðis. Við sjáum bara hvernig vindar blása á morgun, en við erum róleg yfir því," sagði Steini. „Elskum við ekki vindinn eða?" sagði Glódís svo og hló en leikurinn á morgun hefst klukkan 19:30 á Laugardalsvelli.

Það verður mikið húllumhæ í kringum Laugardalsvöll fyrir leikinn; flautað verður til leiks klukkan 19:30 en fyrir leik verður Fan Zone á vellinum. DJ Dóra Júlía og Herra Hnetusmjör munu sjá um að keyra upp stemninguna, matarvagnar verða á svæðinu og hægt verður að fá andlitsmálun. Einnig verður landsliðsvarningur til sölu. Fan Zone-ið opnar klukkan 17:00 og þarf miða á leikinn til að hafa aðgang að því. Hægt er að kaupa sér miða á völlinn á.Tix.is „Við höfum verið að spila á Kópavogsvelli og það hefur verið mjög góð stemning þar. Okkur hefur þótt rosalega vænt um hversu margir hafa komið og stutt við okkur í vondu veðri. Við vonum að það haldi áfram á morgun. Við Íslendingar erum þekkt fyrir það út í heimi að standa með okkar íþróttafólki og við stöndum þétt saman sem þjóð. Við vonum að Íslendingar vilji koma á morgun og styðja við bakið á okkur í þessum gríðarlega mikilvæga leik," sagði Glódís og bætti við:

Það kom íslenska liðinu á óvart hversu passíft austurríska liðið var á heimavelli. Þær fóru ekki í neina hápressu eins og þær höfðu gert fyrr í riðlinum. Líklega hefur hraði Sveindísar Jane Jónsdóttur þar eitthvað að segja. „Þú verður eiginlega að spyrja þær að því," sagði Steini er hann var spurður út í það hvernig leikskipulagi má búast við hjá gestunum á morgun. „Við undirbúum okkur fyrir bæði. Ég býst alveg við því þess vegna að þær fari í hápressu. Maður veit það ekki alveg. Það kom okkur á óvart hversu passívar þær voru síðast. Við þurfum að vera tilbúin í báða möguleikana."

Þorsteinn Halldórsson og Glódís Perla Viggósdóttir sátu fyrir svörum á blaðamannafundi í gær „Ferðalagið gekk bara fínt. Það var smá seinkun en við komumst og náðum að kjósa. Það var allt upp á tíu hvað varðar það. Svo höfum við verið að funda og melta fyrri leikinn. Sjá hvað við getum lært af honum til að ná í sigur á morgun," sagði Glódís Perla Viggósdóttir, landsliðsfyrirliði, á fréttamannafundi á Laugardalsvelli í gær. Afar mikilvægur leikur Bæði Ísland og Austurríki eru með fjögur stig fyrir leikinn í baráttunni um annað sætið í riðlinum. Efstu tvö liðin fara beint á EM en Þýskaland er fimm stigum á undan. Svo er Pólland án stiga. Það gefur því augaleið að leikurinn í kvöld er risaleikur. Ísland spilaði vel í fyrri leiknum en sá leikur endaði með 1-1 jafntefli. Landsliðsþjálfarinn segir augljóst hvað liðið þurfi að gera til að breyta einu stigi í þrjú á morgun. „Við þurfum að skora. Nýta færin. Það er grundvallaratriði. Þær voru meira með boltann en voru ekki að skapa sér mikið. Við vörðum markið okkar vel og sköpuðum færi. Við þurfum bara að nýta þau," sagði Steini

Manuela Zinsberger, markvörður Arsenal og austurríska landsliðsins, verður ekki með gegn Íslandi í undankeppni Evrópumótsins í dag vegna persónulegra ástæðna. Zinsberger átti að standa á milli stanganna í mikilvægum leik gegn Íslandi í undankeppni Evrópumótsins í kvöld, en dró sig úr hópnum af persónulegum ástæðum. Frábærar fréttir fyrir Ísland sem þarf sigur til þess að færast nær sæti á Evrópumótið.

   04.06.2024 07:30

Ein sú mikilvægasta ekki með gegn Íslandi af persónulegum ástæðum

Heil og sæl kæru lesendur og verið hjartanlega velkomin með okkur í þessa beinu textalýsingu Fótbolta.net frá leik Íslands og Austurríkis í undankeppni EM 2025. Ísland og Austurríki eru jöfn að stigum í öðru og þriðja sæti riðilsins, en sigur í þessum leik kæmi Íslandi langleiðina með að komast á Evrópumótið. Flautað verður til leiks á Laugardalsvelli á slaginu 19:15