SKÝRSLAN: Bikardrama af dýrari gerðinni í Keflavík
Hvað réði úrslitum?
Frederik Schram varði eitt víti en Ásgeir Orri ekkert. Leikurinn var frábær skemmtun frá upphafi til enda og erfitt að segja að annað liðið hafi átt eitthvað meira skilið en hitt. Það þurfti þó að fá sigurvegara og í dag varð það Valur eftir alvöru dramatík.
Bestu leikmenn
1. Ásgeir Páll Magnússon
Mér fannst Ásgeir frábær í leiknum í dag. Skoraði gott mark og varðist mjög fimlega í vinstri bakverðinum.
2. Ásgeir Orri Magnússon
Tveir úr tapliði ég veit og báðir heita Ásgeir. En Valur hefði klárað þennan leik í fyrri hálfleik ef ekki fyrir Ásgeir Orra sem átti nokkrar lykilvörslur úr hættulegum færum í fyrri hálfleik. Vítaspyrnukeppni er svo alltaf bara lottó fyrir markmenn.
Atvikið
Jöfnunarmarkið í blálok framlengingar situr eftir. Þvílík stund fyrir yngsta leikmann vallarins Gabríel Aron Sævarsson. Strákur með mikið Keflavíkurhjarta sem Keflvíkingar binda örugglega miklar vonir við.
Hvað þýða úrslitin?
Valur verður í pottinum þegar dregið verður í undanúrslit en Keflvík einbeitir sér að Lengjudeildinni.
Vondur dagur
Það er svo stutt í milli í þessari íþrótt sem maður elskar. Gunnlaugur Fannar setur boltann í eigið net, Frederik Schram missir boltann framhjá sér eftir að hann rúllar yfir smá mishæð á vellinum og Nacho Heras lætur verja frá sér í vítakeppni. Hvert og eitt þessara atvika hefði getað reynst örlagaríkt í dag en eftir stendur vítaspyrna Nacho. Hann var niðurbrotinn eftir leik og setti inn afsökunarbeiðni til Keflvíkinga á Facebook að leik loknum.
Dómarinn - 9
Ef frátalið er fyrsta mark leiksins sem mögulega er rangstaða þá áttu Pétur og hans teymi virkilega góða frammistöðu á vellinum í dag. Leyfði leiknum að fljóta, var ekki að spjalda menn og hélt sig við þá línu næstum því leikinn á enda. Toppframmistaða í toppleik í toppveðri.