Njarðvíkingar byrjuðu leikinn betur en Grindavík unnu sig vel inn í leikinn þegar leið á. Voru ekki endilega mikil gæði í þessu oft á tíðum og smá einbeitningarleysi hjá heimamönnum í föstu leikatriði var nóg til þess að Grindvíkingar gætu refsað þeim grimmilega. Gunnar Heiðar talar um stutta og langa stráið þar sem bæði lið hefðu ekki verið á sínum degi en það kemur ekki að sök þegar talið er upp úr pokanum og þrjú stig fara til Grindavíkur eftir þetta.

Verður maður ekki að nefna bara markið. Aukaspyrna af 40 metrum inn á teig sem Grindavík nær að drepa niður og koma til Adams Árna sem setur hann svo snyrtilega framhjá Aroni Snæ í marki Njarðvíkur og stígur svo einhver danssporin eftir það.

Njarðvíkingar eru áfram í 2.sæti deildarinnar, nú fjórum stigum á eftir toppliði Fjölnis. Grindavík nálgast þá með 16 stig í 4.sætinu og leik til góða til að komast stigi á eftir Njarðvíkingum.

Sóknarleikur Njarðvíkinga átti ekki góðan dag í kvöld. Njarðvíkingar hafa alltaf skorað mörk í sumar nema í kvöld. Þeir fengu færin en þau fóru forgörðum.

Tilturlega þægilegur leikur að dæma finnst mér fyrir Erlend Eiríksson og hans teymi. Enginn stór atvik sem ég man allavega eftir. Leyfði leiknum svolítið að fljóta og eflaust hægt að tína til einhver atriði en enginn sem hefðu haft nein bein áhrif á niðurstöðu leiksins svo þetta endar bara sem 'Solid 7a'.