Byrjunarliðin Jóhann Kristinn Gunnarsson þjálfari Þórs/KA stillir upp sama byrjunarliði og tapaði gegn Breiðabliki í framlengdum leik í Mjólkurbikarnum á föstudaginn.

Það eru þrjár breytingar á liði FH sem vann gegn Tindastóli í síðustu umferð. Birna Kristín Björnsdóttir, Thelma Karen Pálmadóttir og Breukelen Lachelle Woodard, sem tekur út leikbann, detta út.

Helena Ósk Hálfdánardóttir, Snædís María Jörundsdóttir og Andrea Marý Sigurjónsdóttir koma inn í liðið.

Frjálsíþróttamót hefur áhrif á leikinn Fótboltaþjálfarinn Jón Stefán Jónsson, sem þekkir þessa deild býsna vel, spáir í leikina að þessu sinni.

Þór/KA 2 - 1 FH
Alltaf hörku leikir þegar þessi tvö grjóthörðu lið mætast. Rennisléttur Vís-vellurinn verður hins vegar til þess að heimakonur sækja stigin þrjú með 2-1 sigri. Snædís María kemur FH yfir með marki eftir fyrirgjöf frá Elísu Lönu en Þór/KA svarar með mörkum frá Söndru Maríu og Möggu Árna. Magga skorar með langskoti þar sem hún hittir boltann illa en boltinn fer í skemmd í vellinum eftir sleggjukastið á frjálsíþróttamóti um helgina og skýst yfir markmann FH og í netið. Jói mætir í viðtal eftir leikinn og hrósar því hve vel frjálsar íþróttir og fótbolti passa saman á einum og sama vellinum.

Í banni Breukelen Woodard, leikmaður FH, verður í banni í dag. Hún var úrskurðuð í eins leiks bann fyrir að gefa Bryn­dísi Rut Haralds­dóttur, fyrirliða Tindastóls, olnbogaskot í leik liðanna í síðustu umferð.

   02.07.2024 17:16

Leikmaður FH í eins leiks bann fyrir olnbogaskot

Breukelen Woodard

Dómarateymið Sigurður Hjörtur Þrastarson verður með flautuna í kvöld. Bergvin Fannar Gunnarsson og Daníel Ingi Þórisson verða honum til aðstoðar. Sigurjón Þór Vignisson er fjórði dómari og Magnús Sigurður Sigurólason er eftirlitsmaður KSÍ.

Fyrri viðureignir Þór/KA og FH hafa mæst tvisvar í sumar og hefur Þór/KA unnið báða leikina. Sandra María hefur skorað fimm mörk gegn liðinu en hún skoraði öll mörkin í 4-0 sigri í fyrri leiknum í deildinni. liðin mættust í Kaplakrika í 8-liða úrslitum Mjólkurbikarsins þar sem Sandra skoraði eina markið í upphafi síðari hálfleiks eftir að hafa komið inn á sem varamaður.

FH FH er í 4. sæti með 16 stig, fimm stigum á eftir Þór/KA. Liðið hefur fengið 10 stig úr síðustu fimm leikjum. Eina tapið kom gegn Val í þar síðustu umferð en liðið vann góðan 4-1 sigur á Tindastól í síðustu umferð.

Þór/KA Þór/KA er í 3. sæti deildarinnar með 21 stig. Liðið hefur tapað þremur leikjum og unnið sjö en öll töpin komu gegn Breiðabliki og Val (tvisvar). Sandra María Jessen hefur skorað 12 mörk og er langmarkahæst í deildinni en hún hefur ekki skorað í tveimur deildarleikjum í röð.

Mikið álag hefur verið á liðinu undanfarið en liðið hefur spilað þrjá leiki frá 21. júní til 28. júní. Liðið hefur tapað tveimur leikjum í röð, gegn Val í deildinni og Blikum í Mjólkurbikarnum.

Góða kvöldið Verið velkomin í beina textalýsingu frá leik Þórs/KA og FH í Bestu deild kvenna. Leikurinn er liður í 11. umferð og fer fram á VÍS vellinum á Akureyri.