Ísland vinnur 0-1 sigur í Póllandi! Viðtöl eftir leik og einkunnagjöf Fótbolta.net má sjá á síðunni í kvöld.

Íslenska liðið er að klára þessa undankeppni með 13 stig úr leikjunum sex. Þýska liðið vann sinn leik og því endar Þýskaland í efsta sæti riðilsins. Ísland heldur hreinu í þremur leikjum af sex í undankeppninni.

Aftur eru þær pólsku rangstæðar í kjölfar hornspyrnu. Reyndar sýndist mér þetta ekki alveg réttur dómur en það er eins og það er.

Ewa Pajor og Glódís mætast. Glódís nær fyrst að koma boltanum aðeins í burtu en Pajor nær aftur til hans og reynir svo skot en Glódís er vel staðsett og nær að koma sér fyrir. Hornspyrna.

Sveindís kemst í boltann inn á pólska vítateignum. Hún á skot með vinstri fæti sem fer í utanvert hliðarnetið á marki Póllands. Markspyrna.

Amanda með skot sem Kinga ver, frekar laust skot.

Mikill atgangur í vítateig íslenska liðsins. Fanney nær ekki að handsama boltann en sem betur fer fékk Ingibjörg boltann í sig þegar þær pólsku komu skoti að marki.

Guðný er búin að vera alveg frábær í hægri bakverðinum, mjög örugg.

Katla úti hægra megin og sér mikið pláss á hinum vængnum og finnur þar Amöndu. Amanda kemur sér í skotstöðu og lætur vaða. Skotið fer á nær og Kinga er þar mætt.

Pólska liðið tók hornspyrnu stutt en dæmd er rangstaða þegar boltanum er svo sparkað til baka á leikmanninn sem tók hornspyrnuna. Mjög klaufalegt.

Katla með nokkuð efnilega tilraun en skotið fer ofan á markið, rétt yfir.

Guðný verst vel gegn Nadia Krezyman og svo nær Katla að hreinsa boltanum í burtu. Sveindís reynir að æða fram í skyndisókn en hún er toguð niður og Ísland á aukaspyrnu.

Selma Sól situr á vellinum, fór í návígi gegn Klaudiu Lefeld og fór ekkert alltof vel út úr því.

Guðný með fyrirgjöf og finnur liðsfélaga sinn í Kristianstad, Kötlu Tryggvdóttur, en skallinn frá Kötlu er laus og af löngu færi.

Ewa Pajor liggur eftir og heldur utan um vinstri fótinn. Frábær varnarleikur hjá Glódísi sem pikkar boltanum í burtu. Stórkostlega gert. Pajor vildi fá víti þarna en Glódís tók boltann fyrst.

Ewelina Kamczyk með skot fyrir utan teig en það stafar aldrei hætta af þessari tilraun.

Guðrún reynir að finna Hlín með fyrirgjöf en boltinn aðeins of hár.

Nokkrar fyrirgjafir frá pólska liðinu en íslenska liðið verst vel.

Fyrirgjöf sem fer af Amöndu og aftur fyrir. Þær pólsku eiga hornspyrnu.

Mjög hlýtt í Póllandi.

Hildur brýtur af sér og er kannski eilítið heppin að fá ekki gult spjald. Aukaspyrna á vallarhelmingi Póllands.

Fyrirgjöf Karólínar skölluð í burtu og Amanda stöðvar mögulega sókn pólska liðsins með broti.

Hlín með mjög flotta sendingu inn í hlaupið hjá Sveindísi sem vinnur hornspyrnu.

Skrautlega útfærð aukaspyrna hjá Póllandi sem verður ekki að neinu.

Sveindís með fast skot að marki sem fer af varnarmanni og rétt fram hjá. Ísland fær hornspyrnu.

Pólska liðið að sækja hratt en Guðný og Guðrún verjast vel. Varnarlína Íslands verið mjög öflug í þessum leik.

Alexandra gerir frábærlega í því að vinna boltann. Förum upp og Emilía á svo fínasta skot sem Kinga nær hins vegar að verja. Góð tilraun!

Wiankowska með góðan bolta fyrir en Guðrún gerði vel í því að elta Pajor inn á teiginn. Sá til þess að hún næði ekki boltanum.

Þær pólsku að sleppa í gegn en flaggið fer á loft. Pólski lýsandinn hérna við hliðina á mér að missa vitið. Gjörsamlega brjálaður.

Glódís vinnur boltann tvisvar í loftinu eftir hornspyrnu en þær pólsku vinna seinni boltann tvisvar.

Emilía Kiær í mjög góðu færi eftir góða sókn Íslands, en hún skallar fram hjá markinu. Þarna hefði hún getað skorað sitt fyrsta landsliðsmark.

Karólína með flottan bolta fyrir og Sveindís nær skallanum en hann fer yfir markið.

Frábær sókn hjá Íslandi, frábærlega spilað! Karólína með flotta sendingu í gegn á Guðnýju sem er í flottu færi en Kinga Szemik nær að verja með fætinum.

Sveindís liggur eftir eftir að varnarmaður Póllands fer af miklum krafti í skallaeinvígi við hana.

Þýskaland er 3-0 yfir. Greinilega í miklum gír í kvöld eftir niðurlæginguna á Laugardalsvelli.

Karólína með fyrirgjöf sem fer beinustu leið aftur fyrir endamörk.

Alexandra með skalla fram hjá markinu. Fínasta tilraun en hún var svekkt með sjálfa sig að þessum bolta ekki á markið.

Búið að flauta til hálfleiks og Ísland leiðir. Sveindís Jane Jónsdóttir með markið. Vorum með stjórnina lengi vel en pólska liðið byrjaði betur og endaði hálfleikinn betur. Vonandi koma okkar stelpur af krafti inn í seinni hálfleikinn og ganga bara frá þessum leik.

Alexandra Jóhannsdóttir mætti í hálfleiksviðtal í hitanum í Póllandi pic.twitter.com/XpxBwKnVvG

— RÚV Íþróttir (@ruvithrottir) July 16, 2024

Pajor með hörkuskot fyrir utan teig en það fer yfir markið. Íslenska liðið bara að reyna að lifa af fram yfir hálfleik.

Ewa Pajor í algjöru dauðafæri inn á teignum en Glódís á magnaða tæklingu til að bjarga marki!! Besti sóknarmaður og besti varnarmaður heims þarna að mætast!

Ewa Pajor með hörkuskalla úr erfiðu færi en Fanney grípur boltann.

Ewa Pajor með boltann fyrir utan teig og leggur hann til hliðar á Zaremba sem gerir bara eitthvað mjög furðulegt. Pajor er bara á allt öðru gæðastigi en allir aðrir leikmenn Póllands. Þetta er svipað og Lewandowski hefur verið fyrir karlalandslið þjóðarinnar.

Karólína liggur eftir og virðist kvalin. Vonandi ekkert alvarlegt.

Þýskaland að komast í 2-0 gegn Austurríki. Það er því útlit fyrir það að Ísland muni enda í öðru sæti í riðlinum. Við sjáum þó til.

Pólska liðið aðeins farið að herja á okkur. Stelpurnar kannski aðeins slakað of mikið á eftir markið.

Varnarlína Póllands mun fá martraðir í nótt. Þær ráða engan veginn við Sveindísi og hennar hraða.

Ingibjörg með vonda sendingu úr vörninni og þær pólsku keyra á okkur. Natalia Padilla-Billas á svo skot sem fer rétt fram hjá markinu. Ég hélt að þessi væri inni! Ingibjörg náði að henda sér aðeins fyrir boltann sem var vel gert.

Kinga með alveg skelfilega sendingu úr markinu, beint á Emilíu en við náum ekki að gera okkur mat úr þessu.

Ewa Pajor með hættulega fyrirgjöf sem Fanney Inga kýlir frá.

Guðrún Arnardóttir með skalla rétt fram hjá markinu! Hún er bara búin að vera okkar hættulegasti sóknarmaður ásamt Sveindísi.

Pajor með skalla fram hjá markinu, ekki mikil hætta.

Þetta mark er svo sannarlega búið að liggja í loftinu. Frábærlega gert hjá Sveindísi sem er sjóðandi heit um þessar mundir!

Enn er verið að sýna myndir af Þorvaldi Ingimundarsyni, starfsmanni KSÍ, í pólsku útsendingunni. Mjög fyndinn misskilningur.

Steini eða Þorvaldur? Pólska ríkissjónvarpið þreytist ekki á að sýna Þróttarann geðuga Þorvald Ingimundarson í stað þjálfarans Þorsteins Halldórssonar. Er Þorvaldur kannski að stýra liðinu í dag? pic.twitter.com/QjL5JwnoKV

— RÚV Íþróttir (@ruvithrottir) July 16, 2024

Þýskaland er 1-0 yfir gegn Austurríki. Klara Bühl skoraði markið þar eftir ellefu mínútur. Þýskaland er því að vinna riðilinn, sama hvernig endar hér, eins og staðan er núna.

Selma með hornspyrnuna en boltinn er aðeins of langur fyrir Alexöndru. Markspyrna sem Pólland fær.

Sending aftur fyrir vörnina á Sveindísi en hún nær ekki að taka boltann almennilega með sér. Ísland fær hornspyrnu.

Pólland er bara í nauðvörn. Þær gefa okkur boltann trekk í trekk á hættulegum stöðum og við verðum að nýta okkur það. Ísland með öll tök á leiknum þessa stundina.

Sveindís fær smá aðhlynningu í vatnspásunni. Vonandi ekkert alvarlegt.

Leikurinn stöðvaður fyrir vatnspásu. Það er hitabylgja í Póllandi.

Alvöru pressa frá Íslandi þessar síðustu mínútur.

Svo er það hornspyrnan frá Karólínu. Glódís nær skallanum en Szemik er á réttum stað.

Hvernig erum við ekki búin að skora??? Guðrún Arnardóttir með þrumuskot í slánna eftir frábæra sókn hjá Íslandi!

Guðrún Arnardóttir komst næst því að skora fyrir Ísland en vinstri fótar skot hennar skall í tréverkinu ???????? pic.twitter.com/eaa14hKWlz

— RÚV Íþróttir (@ruvithrottir) July 16, 2024

Karólína fær boltann í góðri stöðu og horfir beint á markið. Hún reynir skot en það fer beint í varnarmann.

Sveindís á að vera búin að skora tvisvar í þessum leik. Hún er búin að fá tvö bestu færin.

Sveindís allt í einu kominn með boltann og Szemik er í skógarhlaupi. Markið opið en Sveindís setur boltann í hliðarnetið. Skotvinkillinn var þrögur, en þarna á hún að gera betur.

Kinga Szemik með langan bolta upp völlinn og Pajor eltir, en Glódís er á undan.

Karólína með aukaspyrnu frá vinstri kanti sem Ewa Pajor skallar frá. Selma Sól fær svo boltann fyrir utan teig og reynir skot, en það drífur varla að markinu.

Þetta er Þorvaldur Ingimundarson, starfsmaður KSÍ.

Mikið togað í Sveindísi út við hægri kantinn en Pólland fær innkast. Kjánalegt.

Szemik kýlir hornspyrnu Karólína út úr teignum. Við fáum innkast hinum megin og Sveindís ætlar að kasta langt.

Sveindís í dauðafæri eftir hraða sókn Íslands. Karólína þræðir hana snyrtilega í gegn en skotið fer af varnarmanni og fram hjá. Þarna átti Sveindís bara að skora fyrsta markið en varnarleikurinn var líka góður.

Pólland með stórhættulegan bolta fyrir úr hornspyrnu en Dowle flautar brot. Fór í gegnum allan pakkann en þetta var frábær bolti.

Pólska liðið verið sterkara þessar fyrstu mínútur og þeirra sóknaraðgerðir verið hættulegar.

Völlurinn virkar frekar laus í sér. Sveindís rann í grasinu þegar hún fór í pressuna áður en Pólland fékk þetta tækifæri.

Pólska liðið komið í stórhættulega stöðu. Ewa Pajor með sendingu fyrir á Kokosz sem er ein á fjærstönginni en hún nær sem betur fer ekki að taka á móti boltanum.

Glódís nær ekki að vinna fyrsta boltann og pólska liðið skallar frá.

Fáum langt innkast frá Sveindísi.

Pólska liðið kemst í fína stöðu. Bolti fyrir markið en Glódís er á undan Ewu Pajor í boltann og kemur honum frá.

Þetta er farið af stað! Ewa Pajor, markahæsti leikmaður þýsku úrvalsdeildarinnar, sparkar leikinn í gang. ÁFRAM ÍSLAND!

Þjóðsöngvarnir að baki og leikurinn fer að byrja.

Styttist í leikinn. Fánarnir komnir upp og liðin fara að ganga inn hvað úr hverju. Það er mjög fámennt en góðmennt á áhorfendapöllunum.

Ólafur Pétursson er ekki með í Póllandi í dag. Fjalar Þorgeirsson, markvarðarþjálfari karlalandsliðsins, stígur inn í hans fjarveru.

Þorsteinn Halldórsson landsliðsþjálfari fer yfir átökin sem fram undan eru í spjalli við RÚV. Þorsteinn gerir fjórar breytingar á liðinu sínu. Hann ræðir meðal annars fyrsta byrjunarliðsleik Emilíu og hvort að liðið sé að spila sinn besta bolta frá því hann tók við.

Þorsteinn Halldórsson landsliðsþjálfari fór yfir átökin sem fram undan eru. Þorsteinn gerir fjórar breytingar á liðinu sínu. Hann ræðir meðal annars fyrsta byrjunarliðs Emilíu og hvort að liðið sé að spila hans bolta frá því hann tók við ???????? pic.twitter.com/m426WrEwU9

— RÚV Íþróttir (@ruvithrottir) July 16, 2024

Stjörnuljósmyndarinn Jónína Guðbjörg er á vellinum með myndavélina. Hún tók þessar myndir af vellinum fyrir leik. Það er ekki annað hægt að hugsa en að þessi völlur yrði virkilega flottur í Laugardalnum. Það þyrfti bara að mála sætin blá. Hér allt virkilega flott og ferskt.

Ewa Pajor byrjar fremst hjá Póllandi en hún var langmarkahæst í þýsku úrvalsdeildinni á síðasta tímabili með 18 mörk. Hún er liðsfélagi Sveindísar Jane Jónsdóttur hjá Wolfsburg en Glódís Perla Viggósdóttir, landsliðsfyrirliði Íslands, segir að um sé að ræða líklega besta framherja í heimi í dag.

Þorsteinn Halldórsson, landsliðsþjálfari Íslands, gerir fjórar breytingar á byrjunarliðinu. Ísland vann magnaðan 3-0 sigur gegn Þýskalandi síðasta föstudag en frá þeim leik koma Guðrún Arnardóttir, Selma Sól Magnúsdóttir, Hlín Eiríksdóttir og Emilía Kiær Ásgeirsdóttir inn í liðið. Emilía, sem valdi nýverið að spila frekar fyrir Ísland en Danmörku, er að byrja í fyrsta sinn með Íslandi og er að spila sinn annan landsleik. Natasha Anasi, Hildur Antonsdóttir, Sandra María Jessen og Diljá Ýr Zomers fara á bekkinn frá sigrinum gegn Þýskalandi.

Leikið er á Zaglebiowski Park Sportowy í um 20 mínútna akstursfjarlægð. Þetta er heimavöllur Zaglebie Sosnowiec sem var að falla í pólsku C-deildina. Þetta er glænýr völlur og var hann opnaður í fyrra. Hann tekur um 11,600 manns í sæti. Þetta væri virkilega flottur þjóðarleikvangur fyrir okkur Íslendinga.

Það er búið að vera mikill hiti í Katowice í dag. Núna síðasta klukkutímann hafa verið þrumur og eldingar í bland við 28 stiga hita. Ekki mjög íslenskt veður.

Eftir 3-0 sigurinn gegn Þýskalandi á föstudag, þá er Ísland með innbyrðis sigurinn á þýska liðið í riðlinum. Í dag spilar Ísland við Pólland á meðan Þýskaland mætir Austurríki. Ef Þýskalandi mistekst að vinna Austurríki - sama hvort það er jafntefli eða tap - og Ísland vinnur Pólland, þá vinna stelpurnar okkar þennan sterka riðil. Ef Ísland vinnur riðilinn, þá verður liðið í efsta styrkleikaflokki þegar dregið verður í mótið. Það myndi svo sannarlega auka líkurnar á því að gera vel á mótinu. Þessi leikur skiptir því svo sannarlega miklu máli, en við verðum jafnframt líka að treysta á það að Austurríki muni stríða Þýskalandi. Ísland er eitt af sex liðum sem er búið að tryggja sér farseðilinn á EM en hin liðin eru: Sviss (gestgjafar), Þýskaland, Spánn, Danmörk og Frakkland.

Það var mikil stemning eftir leikinn gegn Þýskalandi og mikið fagnað. Stelpurnar voru í ákveðnu spennufalli eftir leikinn og þær voru sammála um að stuðningurinn hefði verið magnaður.

Síðasti leikur Íslands gegn Póllandi var fyrsti leikurinn í þesssari undankeppni. Sá leikur endaði með 3-0 sigri Íslands þar sem Diljá Ýr Zomers, Bryndís Arna Níelsdóttir og Sveindís Jane Jónsdóttir gerðu mörkin. Sá leikur fór fram á Kópavogsvelli í góðri stemningu.

Síðasta föstudagskvöld var hreint út sagt ótrúlegt þar sem íslenskt landslið vann einn sinn stærsta sigur í sögunni. Þær unnu þá Þýskaland 3-0 fyrir framan meira en 5000 manns á Laugardalsvelli. Ingibjörg Sigurðardóttir, Alexandra Jóhannsdóttir og Sveindís Jónsdóttir með mörkin. Sá sigur tryggði Íslandi sæti á EM en maður er enn bara pínu að ná sér niður eftir þessi ótrúlegu úrslit.

Og verið velkomin í beina textalýsingu frá leik Póllands og Íslands í undankeppni EM 2025. Fótbolti.net er auðvitað í Póllandi að fylgjast með leiknum.