SKÝRSLAN: Katie var bara Katie
Hvað réði úrslitum?
Yfirburðir Vals í fyrri hálfleik voru rosalegir. Þær sköpuðu sér ekkert endalaust af færum en þær dómíneruðu Blika algjörlega. Gestirnir komust varla út af sínum vallarhelmingi og þær áttu bara í bölvuðu basli með að hreyfa boltann. Miðan hjá Val var ógnarsterk og hafði mikil áhrif á úrslit leiksins.
Bestu leikmenn
1. Katie Cousins (Valur)
Galdrakona í fótbolta. Valur náði að sannfæra hana um að koma á Hlíðarenda fyrir tímabilið og það var ótrúlegur happafengur. Hún valdi að fara í nýtt umhverfi og það hefur borgað sig fyrir bæði hana og Val. Magnaður leikmaður sem stjórnaði leiknum í dag. Nik Chamberlain, þjálfari Breiðabliks, orðaði það vel eftir leikinn í dag: ,,Katie var bara Katie."
2. Berglind Rós Ágústsdóttir (Valur)
Var algjörlega frábær með Katie inn á miðsvæðinu. Þær stjórnuðu leiknum saman. Braut upp margar sóknir Blika og var mjög svo kraftmikil.
Atvikið
Í leik þar sem eitt mark er skorað, þá er það markið sem er auðvitað atvik leiksins. Flott mark hjá Katie Cousins en afskaplega klaufalegt hjá Blikum.
Hvað þýða úrslitin?
Valur fer á toppinn inn í verslunarmannahelgina og þær geta skemmt sér vel. Eru með þriggja stiga forskot á Blika, en þessi barátta er enn opin. Það er alveg klárt.
Vondur dagur
Blikar voru ólíkar sjálfum sér í fyrri hálfleiknum. Mættu ekki til leiks og komust ekkert áleiðis. Þetta var vondur dagur fyrir þær flestar á þeim kafla í leiknum, og líka bara í seinni hálfleik þar sem þær náðu ekki að skapa sér mikið. Ásta átti klaufalega sendingu í markinu, Heiða og Karitas töpuðu baráttunni á miðjunni, Andrea var pirruð, Hrafnhildur Ása tapaði boltanum mikið, Vigdís Lilja og Birta voru ekki í miklum takti og Katrín nýtti ekki þau fáu færi sem hún fékk. Í raun hægt að taka allt Blikaliðið hérna, allavega framan af.
Dómarinn - 8
Bara vel dæmdur leikur hjá Erlendi og hans teymi. Komust vel frá sínu.