Fyrstu 11 mínútur leiksins voru svakalegar. Víkingar komast yfir eftir 2 mínútur, þeir missa svo Gunnar Vatnhamar í meiðsli. Þar á eftir var eins og þeir væru að spila manni færri í vörninni þótt Jón Guðni hefði komið inn á fyrir Gunnar, og FH skorar 2 mörk með stuttu millibili. Víkingar tóku töluvert yfir leikinn þar á eftir og sérstaklega í seinni hálfleik þar sem varamennirnir Sveinn Gísli og Valdimar Þór sáu um mörkin til að vinna leikinn fyrir Víkinga.

Á loka sekúndum leiksins fá FH-ingar horn. Þar skoppast boltinn á milli manna og Sindri Kristinn markvörður FH sem var kominn upp í teig fær meira segja færi á að reyna við skot. Sigurður Bjartur endar á að taka skot sem er á leiðinni framhjá en Logi Hrafn sem er rétt hjá markinu nær að pota í boltan en skotið frá honum fer yfir markið. Munaði litlu að FH jafnaði leikinn með lokasnertingu leiksins en Sigurður Hjörtur dómari leiksins flautaði leikinn af strax eftir þetta.

Víkingar eru með 9 stiga forskot á toppi deildarinnar en Breiðablik sem er næsta lið á eftir á 2 leiki inni á þá, og Valur einnig en þeir eru 11 stigum á eftir. FH heldur sér í 4. sætinu og munu ekki fara þaðan sama hvernig fer í þessari umferð.

Gunnar Vatnhamar fer af velli á 5. mínútu leiksins vegna meiðsla. Þetta er agalegur tímapunktur fyrir svona mikilvægan leikmann í Víkings liðinu að meiðast því þeir eru í bullandi séns að komast langt í Evrópukeppni. Í viðtali eftir leik sagði Arnar Gunnlaugsson þjálfari Víkings að menn óttast að Gunnar hafi tognað og gæti því verið frá í einhverjar vikur.

Flottur leikur hjá Sigurði Hirti og hans teymi af mínu mati. Nokkur vítaköll, sem mér fannst Sigurður fara hárrétt með að vísa til föðurhúsana.