SKÝRSLAN: Blikar með örlögin í sínum eigin höndum eftir að jafna Víking að stigum
Hvað réði úrslitum?
Blikarnir voru heilt yfir betra liðið í dag og nýttu sín færi vel. Þeir fengu svo sem ekki mikið af dauðafærum fyrir utan mörkin en þeir þurftu bara ekki meira en þetta. Einstaklingsgæði og stjórnun á leiknum sem kláraði þetta fyrir þá.
Bestu leikmenn
1. Ísak Snær Þorvaldsson (Breiðablik)
Ísak virðist vera kominn aftur í sitt besta leikform. Þegar hann fer á flug er enginn varnarmaður sem getur stöðvað hann og svo er gríðarleg tækni í honum eins og hann sýndi í markinu.
2. Fred Saraiva (Fram)
Fred lagði upp mark Framara og hefði átt að vera með aðra stoðsendingu eftir algjörlega magnaða sendingu inn fyrir sem Magnús Þórðar klúðraði glæpsamlega. Hann var svo ósköp nálægt því að skora beint úr aukaspyrnu. Með örlítilli heppni hefði bæði þessi atvik fallið með honum og leikurinn hefði getað farið 3-3
Atvikið
Alex Freyr Elísson brýtur af sér rétt fyrir utan teig og meiðist svo sjálfur í kjölfarið. Hann þarf að fara útaf með börum og leikurinn er stopp í nokkrar mínútur. Þegar Blikar fá svo loksins að taka spyrnuna þá smyr Patrik boltanum bara beint upp í skeytin með frábærri spyrnu og gerir út um leikinn. Framarar voru aldrei líklegir til að koma til baka eftir það.
Hvað þýða úrslitin?
Breiðablik er búið að jafna Víking af stigum á toppi deildarinnar þar sem Víkingar töpuðu fyrir ÍA í kvöld. Þetta galopnaði titilbaráttuna sem verður að teljast vera fagnaðarefni fyrir íslenska knattspyrnu áhugamenn. Fram er enn í 6. sæti deildarinnar en það er stutt í liðin í kringum þá bæði fyrir ofan og neðan.
Vondur dagur
Nýji leikmaður Framara, Gustav Dahl spilaði bara fyrri hálfleikinn í sínum fyrsta leik fyrir liðið. Hann komst aldrei í takt við leikinn og náði ekki alveg að heilla mig í frumraun sinni. Rúnar Kristins þjálfari hans talaði þó vel um hann eftir leik þannig við gætum mögulega séð hann vaxa inn í íslenskan fótbolta með tímanum.
Dómarinn - 9
Vel dæmt hjá Twana og teymi. Ekkert sérstakt sem ég man eftir til að setja út á.