Heyr mína bæn! Liðin ganga til vallar!

Til hamingju KA! Áður en fjörið fer af stað hér í Vesturbænum er um að gera að óska KA til hamingju með bikarmeistaratitilinn. Aðdáunarverð frammistaða hjá Akureyringum í Laugardalnum í gær.

Schubert í rammanum
Daninn Benjamin Schubert ver mark Vestra í dag. Hann er með reynslu úr fyrstu og annarri deild í Danmörku og efstu deild í Færeyjum. Á síðasta tímabili lék hann með B68 í Tóftum í færeysku Betri deildinni. Hann spilar sinn fyrsta leik í íslensku deildinni í dag.

Höfuðborgin skartar sínu fegursta Sólin skín. Það er að koma í ljós að september er besti sumarmánuðurinn. Völlurinn er samt eins og hann er, barn síns tíma. Rjúkandi Domino's pizzur mættar í fréttamannastúkuna og Jói Leeds er hæstánægður. Hann spáir útisigri þar sem Andri Rúnar Bjarnason muni skora sigurmarkið.

Byrjunarliðin eru komin inn Axel Óskar Andrésson er ekki í leikmannahópi KR. Jón Arnar Sigurðsson og Gyrðir Hrafn Guðbrandsson koma inn í byrjunarliðið frá síðasta leik, 4-1 tapinu gegn Val.

Benjamin Schubert ver mark Vestra. Þá kemur Vladimir Tufegdzic inn í byrjunarliðið í stað Silas Songani.

Aron og Eskelinen í banni KR verður án Arons Sigurðssonar í dag þar sem hann tekur út leikbann vegna uppsafnaðra áminninga. Vestri verður án William Eskelinen markvarðar síns en gula spjaldið þegar hann fékk á sig víti gegn Stjörnunni var hans fjórða áminning á tímabilinu.

Fyrri viðureignir þessara liða í sumar
Benoný Breki Andrésson kom KR í 2-0 þegar þessi lið mættust á Meistaravöllum þann 25. maí. Vladimir Tufegdzic og Pétur Bjarnason skoruðu hinsvegar fyrir Vestra í seinni hálfleik og tryggðu 2-2 jafntefli.

Þann 17. ágúst mættust liðin svo á Ísafirði þar sem Pétur Bjarnason og Elmar Atli Garðarsson skoruðu í 2-0 sigri Vestra. Ísfirðingar því ósigraðir gegn KR í sumar.

Svona er staðan í neðri hlutanum áður en honum verður sparkað í gang

KR unnið tvo af fimmtán síðustu deildarleikjum
Þetta hefur verið helvíti dapurt tímabil hjá KR-ingum sem hafa aðeins unnið fimm deildarleiki í sumar og unnið tvo af síðustu fimmtán. Sjálfstraust leikmanna virðist við frostmark og enginn í liðinu axlar ábyrgð. Það virðist rosalega langur vegur framundan fyrir Óskar Hrafn Þorvaldsson að smíða almennilegt lið úr þessu.

Djúpmenn í bölvuðum vandræðum með að koma boltanum í markið!
Vestri hefur aðeins skorað 22 mörk í 22 leikjum, og þó stærðfræði hafi aldrei verið mín sterkasta hlið veit ég að það er bara eitt mark í leik að meðaltali. Liðið er erfitt viðureignar og með baráttugleðina að vopni en það þarf að brýna hnífana sóknarlega ef það ætlar að halda velli í deildinni. Það þarf að sækja til sigurs hér í dag!

Dómari: Ívar Orri Kristjánsson
Aðstoðardómarar: Birkir Sigurðarson og Sveinn Ingi Sigurjónsson Waage.
Fjórði dómari: Helgi Mikael Jónasson.

Hinir goðsagnakenndu Meistaravellir
Góðan og gleðilegan sunnudag! Sunnudagur er besti dagur vikunnar og hann færir okkur upphaf tvískiptu Bestu deildarinnar. Við hefjum leik á hinum goðsagnakenndu Meistaravöllum þar sem Vestramenn koma í heimsókn í gríðarlega mikilvægum fallbaráttuslag. Spennið beltin!