SKÝRSLAN: Þrjú stig í Úlfarsárdalinn
Hvað réði úrslitum?
Víkingur voru meira með boltann og stýrðu leiknum að stærstum hluta. Þær sköpuðu sér nóg af góðum tækifærum sem þeim tókst ekki að nýta nægilega vel. Framarar voru beinskeyttar þegar þær unnu boltann og nýttu sér vel þegar Víkingsliðið var að sækja á mörgum leikmönnum. Þær nýttu færin sín í kvöld sem var nóg til að tryggja þeim sigur.
Bestu leikmenn
1. Elaina Carmen La Macchia
Var mjög góð í kvöld, varði nokkrum sinnum vel og var örugg í öllum sínum aðgerðum. Hún stóð af sér fjölmargar fyrirgjafir og sóknir þar sem Víkingum tókst að koma boltanum á markið.
2. Alda Ólafsdóttir
Mark og stoðsending. Kemur Fram yfir á mikilvægum tímapunkti þegar Víkingur hafði hótað marki í dágóðan tíma. Á svo sendinguna í gegn á Murielle sem tryggir þeim stigin þrjú. Bergdís Sveins var best í liði Víkings.
Atvikið
Veðrið gat ekki ákveðið sig og bauð upp á þvílíkt úrval á meðan leik stóð. Það toppaði sig á 93. mínútu leiksins með einhverju mesta hagléli sem ég hef séð, það leit út fyrir að vera snjóbylur inni á vellinum.
Hvað þýða úrslitin?
Fram sækir sinn annan sigur í Bestu deildinni og fer upp í 6. sæti með sex stig.
Víkingur er áfram með þrjú stig og fara niður í 8. sæti.
Vondur dagur
Mér fannst mikið af góðum frammistöðum og erfitt að pikka í einhvern sem átti vondan dag. Víkingsliðið sem heild er sjálfsagt mjög svekkt með niðurstöðuna í kvöld þó frammistaðan hafi verið góð. Þrjú stig eftir fimm umferðir er ekki það sem þær sáu fyrir sér.
Dómarinn - 7
Fín frammistaða hjá Bríet og co. Engar stórar ákvarðanir sem þurfti að taka og lítið sem hægt er að kvarta yfir.