SKÝRSLAN: Þrautseigju sigur í lokuðum leik
Hvað réði úrslitum?
Spilamennska Aftureldingar í dag var bara frábær. Alvöru agi og liðsheild skilaði þeim í 8-liða úrslit. Þá nýttu heimamenn i ÍA ekki þau fáu færi sem þeir fengu.
Bestu leikmenn
1. Benjamin Stokke (Afturelding)
Flottur leikur hjá Stokke, var ekkert of mikið í boltanum en þegar hann komst í hann var hann alltaf hættulegur. Skoraði markið sem skildi liðin að.
2. Axel Óskar Andrésson (Afturelding)
Eins skrítið og það er að setja mann sem fékk rautt í bestu menn þá var Axel Óskar með alla sóknarlínu Skagamanna í vasanum fram að rauða spjaldinu! Var að éta hvern einasta bolta sem kom í hans átt og kom í veg fyrir að heimamenn fengu fleiri færi en raun bar vitni.
Atvikið
Markið hans Stokke breytti algjörlega leiknum, skellti Skagamönnum alveg niður á jörðina og náðu Skagamenn í raun aldrei að koma sér aftur inní leikinn eftir það. Afturelding fékk hins vegar sjálfstraust við markið sem þeir notuðu til að loka leiknum.
Hvað þýða úrslitin?
Afturelding fara áfram í 8-liða úrslit Mjólkurbikarsins á kostnað Skagamanna sem geta nú einbeitt sér að því að snúa við slöku gengi í deild.
Vondur dagur
Ég ætla setja þetta á sóknarlínu Skagamanna. Vantaði upp á öll gæði á seinasta þriðjungi vallarins og í þeim fáu færum sem þeir fengu þá vantaði virkilega upp á færanýtinguna.
Dómarinn - 8
Mjög góður dagur hjá Gunnari og hans teymi. Fannst hann leyfa leiknum að flæða mest allan leikinn en stundum einum of mikið á flautunni. Samt heilt yfir fínn og hárrétt rautt spjald.