SKÝRSLAN: Blikar völtuðu yfir FHL í seinni hálfleik
Hvað réði úrslitum?
Breiðabliksliðið var miklu betra liðið á vellinum í dag en hér ber að hrósa Keelan Terrell markmanni FHL því hún kom í veg fyrir að Breiðabliksliðið skoraði á annan tug marka. FHL voru aldrei að fara að fá fyrstu stigin sín í deildinni á Kópavogsvelli.
Bestu leikmenn
1. Birta Georgsdóttir (Breiðablik)
Birta var frábær í dag. Var endalaust í boltanum og átti vörn FHL alveg í dag. Lagði upp 2 mörk og skoraði 1. Auðvelt val.
2. Berglind Björg Þorvaldsdóttir (Breiðablik)
Berglind var flott í leiknum og báðir framherjar Breiðabliksliðsins eiga þetta í dag. Ég verð samt að segja að Keelan Terrell var líka mjög öflug en ég get ekki valið markmann sem fékk á sig 6 mörk.
Atvikið
3 mörk Breiðabliks á 5 mínútna kafla í seinni hálfleik. Þá gerðu heimakonur gjörsamlega út um leikinn og FHL sáu aldrei til sólar eftir að hafa lent 5-0 undir. Eiginlega magnað hvað Keelan Terrell varði mörg skot og kom þar af leiðandi í veg fyrir stærra tap gestanna.
Hvað þýða úrslitin?
Breiðablik kemst á topp deildarinnar, eða þar til Þróttur hefur spilað við Þór/KA síðar í dag. FHL er ennþá með 0 stig á botni deildarinnar og það virðist þurfa kraftaverk, eða alvöru styrkingar, til þess að liðið haldi sér uppi í Bestu-deildinni.
Vondur dagur
Vörn FHL. Það er ekki þeim að þakka að Breiðablik hafi ekki skorað 20 mörk í leiknum í dag. Keelan Terrell fékk haug af skotum á sig og ansi mörg færi sem Breiðabliksliðið fékk sem hún náði að grípa inn í áður en verr fór.
Dómarinn - 9
Stefán Ragnar og hans teymi áttu stórfínan dag í dag. Einu vafaatriðin í leiknum voru hárrétt hjá þeim þannig ekkert við þá að klaga.