SKÝRSLAN: Á hlutlausum velli í hlutlausum gir
Hvað réði úrslitum?
Shaktarliðið er bara heldur mörgum númerum of stórt fyrir Blika sem og önnur íslensk lið svona almennt. Þeir gátu leyft sér að hvíla sína lykilmenn en samt sem áður sigla þægilegum sigri í höfn án þess að hafa eitthvað of mikið fyrir því. Blikar gerðu margt vel varnarlega og geta alveg gengið sáttir af velli. Fátt meira en það hægt að segja.
Bestu leikmenn
1. Artem Bondarenko
Skoraði glæsilegt mark á lofti eftir hornspyrnu og var þess utan gríðarlega öruggur á miðsvæði Shaktar liðsins sem var annars í öðrum gír allan leikinn
2. Valgeir Valgeirsson
Í ljósi þess að heimamenn voru aldrei á fullu gasi í leiknum fær Valgeir sérstakt shout hér. Alltaf gaman að sjá keppnismenn að störfum sem gefa allt sitt óháð andstæðing og stöðu leiks.
Atvikið
Undir lok fyrri hálfleiks fengu Blikar horn. Er hornið var tekið stutt var Arnór Gauti rifinn niður í teignum af varnarmanni og að mínum dómi vel hægt að réttlæta brot og þar með víti. VAR skoðaði atvikið en ákvað að aðhafast ekki. Hefði verið gaman að fara inn í hálfleik með 1-1 stöðu en úr því varð ekki.
Hvað þýða úrslitin?
Blikar enn án sigurs við botn Sambandsdeildarinnar með 1 stig. Shaktar fer í 6 stig og heldur baráttu sinni um sæti í 16 liða úrslitum eða umspili áfram.
Vondur dagur
Erfitt að tala um vondan dag hjá nokkrum manni. Helst að þeir sem bjuggust við fjörugum leik hafi orðið fyrir vonbrigðum.
Dómarinn - 6
Full gjafmildur í garð Shaktarmanna sem fengu þó nokkrar ódýrar aukaspyrnur í leiknum. Ég set alveg spurningamerki við hvort Blikar hafi átt að fá víti en heilt yfir bara ágætis frammistaða hjá Rúmenanum.