SKÝRSLAN: Þróttarar áfram í Mjólkurbikarnum eftir öruggan sigur
Hvað réði úrslitum?
Víkingar börðust vel, en Þróttarar höfðu einfaldlega meiri gæði á vellinum. Bæði lið eru ennþá að undirbúa sig fyrir deildina sem byrjar ekki strax og því sást alveg að hvorugt lið var komið á fulla ferð.
Bestu leikmenn
1. Sigurður Egill Lárusson (Þróttur)
Sigurður Egill sýndi það strax í fyrsta mótsleik hversu mikill svindlkall hann á eftir að vera í Lengjudeildinni. Tvær frábærar stoðsendingar, svo var hann allt í öllu í færunum sem enduðu ekki í marki líka.
2. Baldur Hannes Stefánsson (Þróttur)
Baldur var sterkur á miðjunni, þetta var baráttu leikur og hann þurfti á köflum að standa í ströngu við Víkingana. Svo skoraði hann eitt gott skalla mark.
Atvikið
Þriðja mark Þróttara kom frekar skömmu eftir að Víkingar minnkuðu muninn í 2-1. Það var mjög mikilvægt fyrir Þróttara að hleypa gestunum ekki inn í leikinn og eftir það var frekar augljóst hvaða lið myndi vinna.
Hvað þýða úrslitin?
Þróttarar fara áfram í Mjólkurbikarnum og byrja tímabilið sitt vel. Víkingar fara í páskafrí með tap á bakinu, en stutt í æfingaferð hjá þeim.
Vondur dagur
Hægri kantur Víkinga var í veseni varnarlega. Gabríel Þór Þórðarson sem var í hægri bakverði á líkast til eftir að dreyma um Sigurð Egil sem var að hrella hann allan leikinn.
Dómarinn - 8
Engin stór atriði í leiknum, það færðist smá harka í leikinn seint í seinni hálfleiknum en Twana leyfði leiknum að fljóta vel og var ekkert að veifa spjaldinu að óþörfu.