SKÝRSLAN: Fimm mörk og olnbogaskot
Hvað réði úrslitum?
Færanýting Stjörnunnar var mjög góð. 1-1 í hálfleik var mjög sanngjarnt þó að mark Þórs/KA hafi komið seint í leiknum. Gestirnir galopnuðu vörn heimakvenna í marki tvö og ógnuðu svo í föstum leikatriðum. Skilvirkur sóknarleikur, en liðið getur pottþétt spilað mun betur. Leikurinn var heilt yfir nokkuð jafn og var alls ekki þriggja marka munur á liðunum í spilamennsku úti á velli.
Bestu leikmenn
1. Snædís María Jörundsdóttir
Skoraði tvö í dag og það reyndist mjög dýrmætt. Tvö mjög góð mörk frá sóknarmanninum
2. Telma Steindórsdóttir
Skorar þriðja markið í dag með góðum skalla og var nokkuð öflug í hjarta varnarinnar fannst mér. Andrea Mist gerir líka sterkt tilkall á gamla heimavellinum sínum, lék vel inn á miðjunni, sá svipaða skó og hún var í sjálf og hitti á Telmu inn á teignum og skoraði svo sjálf - Andrea er með frábæran fót. Birgitta Rún fannst mér heilt yfir best hjá heimakonum.
Atvikið
Í stöðunni 1-3 á sér stað atvik sem ég sá ekki úr fjölmiðlastúkunni en viðbrögð þjálfara Þórs/KA benda til þess að leikmaður Stjörnunnar hefði átt að fá rautt spjald fyrir olnbogaskot og eftir viðtöl við þjálfarana finnst mér það enn líklegra. Það hefði getað haft einhver áhrif. Fyrir utan það var það sennilega þriðja mark Stjörnunnar sem gaf liðinu andrými.
Hvað þýða úrslitin?
Stjarnan verður í pottinum er dregið verður í 8-liða úrslitum Mjólkurbikarsins.
Vondur dagur
Mér leið eins og Þór/KA hefði á köflum verið á skotæfingu, þegar leikmenn sáu mark andstæðinganna var ákveðið að skjóta. Margar skottilraunir en of fáar sem ógnuðu af ráði. Markið kom eftir gott spil en liðið þarf að fjölga góðum spilköflum sem skapa góðar stöður á síðasta þriðjungi að mínu mati.
Dómarinn - 7
Mér fannst Sveinn dæma þennan leik vel, ég hef ekki séð stóra atvikið aftur en mér líður eins og hann hafi ekki verið með sjónlínu á það. En það er spurning hvort aðstoðardómarar hans hefðu getað aðstoðað hann í því atviki.