Jafntefli niðurstaðan í frekar skemmtilegum leik. Ég held að bæði lið séu fúl með niðurstöðuna.

Viðtöl og skýrsla koma inn síðar í kvöld.

Bjarki Hrafn við það að komast í dauðafæri en Ásgeir Orri gerir vel að koma út á móti og lokar. Kannski smá lykt af broti en Stjörnumenn voru ekki að kvarta mikið.

Bjarki Hauks með fínt skot en Ásgeir er vel staðsettur og nær að grípa.

Daníel Finns með gott hlaup og reynir skot en það er slakt og Ásgeir á ekki í neinum vandræðum með að verja það.

Ásgeir Páll kominn í fína stöðu en reynir fyrirgjöf sem misheppnast algjörlega.

Ásgeir Orri er staðinn upp og klár í að halda áfram.

Bjarki Hauks, hættulegasti maður Stjörnunnar, við það að komast í fínt færi en missir boltann of langt frá sér og Ásgeir Orri kemur út á móti. Bjarki fer svo í Ásgeir sem liggur eftir.

Gestirnir dottnir í smá skotgrafir. Keflavík er að banka fast.

,,Hvað ertu að gera?" heyrist úr stúkunni þegar Halid Alghoul reynir skot af löngu færi. Fer lengst yfir.

Halid Alghoul svo með hættulegt skot sem fer rétt fram hjá markinu. Ásgeir Páll var ekki langt frá því að setja hausinn í boltann.

Muhamed Alghoul með geggjaða sendingu inn fyrir á Ljubicic en Árni Snær sér við honum. Ljubicic á bara að vera búinn að klára þennan leik fyrir Keflavík.

Svo á Eiður Orri hættulega tilraun en boltinn fer fram hjá.

Núna stendur xG-bardaginn í 1,29 - 1,70, Stjörnunni í vil.

Bjarki Hauksson, sem hefur komið mjög vel inn í lið Stjörnunnar, með hættulega sendingu inn fyrir en Andri Rúnar nær ekki að komast í boltann. Munaði ekki miklu.

Þá eru bræður saman inn á vellinum fyrir Keflavík, Muhamed og Halid Alghoul.

Ásgeir Páll með góðan bolta inn á teiginn og þar nær Stefan Ljubicic auðvitað að koma sér í færi en Árni Snær nær að verja og grípa skalla hans.

Þetta hefur bara ekki verið dagurinn hans.

Keflvíkingar ná að verjast horninu en sókn Stjörnunnar heldur áfram. Sindri fær ágætis skallafæri en nær ekki miklum krafti í hann.

Stjarnan við það að komast í mjög gott færi en þá er Breki Baxter mættur til að stoppa það. Gestirnir fá hornspyrnu.

Eiður Orri reynir skot með vinstri en Sindri setur fótinn í það. Var hvort sem er ekki á leið á markið.

Hornspyrnan er slök og Stjörnumenn skalla frá.

Ljubicic nær skalla á markið eftir hornspyrnuna en gestirnir eru fyrir. Keflavík fær svo aðra hornspyrnu.

Það er meiri kraftur í Keflvíkingum þessa stundina og þeir eru líklegri. Fá hér hornspyrnu.

Nacho Heras nær skallanum eftir hornspyrnuna en hann er kraftlítill og fer ekki á markið.

Eiður Orri sækir hornspyrnu fyrir Keflvíkinga.

Ljubicic ósáttur við Gunnar Frey. Vildi fá aukaspyrnu þegar ýtt var í hann, ekkert dæmt. Stuttu síðar heldur Sindri vel í hann og þá er dæmt.

Dagur Ingi með fína skottilraun sem fer rétt fram hjá markinu. Mjög góð tilraun!

Gestirnir eru með stjórnina þessa stundina og eru hættulegir.

Stjörnumenn spila vel og Haukur Brink er kominn í frábært færi til að skora en nær ekki að koma skotinu á markið. Þarna átti hann bara að gera betur og Keflvíkingar heppnir.

Bjarki Hauks með góðan bolta inn á teiginn en Haukur Brink rétt missir af honum.

Alghoul aftur með góðan bolta inn á teiginn en Keflvíkingar ná ekki að koma skoti á markið. Hitta ekki boltann inn á teignum.

Alghoul með aukaspyrnuna inn á teiginn og finnur Davíð Helga en skalli hans fer eiginlega bara upp í loft og er þægilegur fyrir Árna í markinu.

Stjarnan að komast í ágætis upphlaup en Guðmundur Baldvin klaufi að vera rangstæður.

Eiður Orri með langt innkast inn á teiginn og Ásgeir Páll fær mjög gott færi til að skora en skalli hans er beint á Árni. Reyndi of mikið að ná krafti í skallann í stað þess að reyna að beina honum í hornið.

Keflvíkingar skalla í burtu og svo kemur háloftabolti inn á teiginn sem Ásgeir Orri grípur þægilega.

Núna fær Stjarnan aukaspyrnu úti vinstra megin sem Jóhann Árni gerir sig tilbúinn að taka.

Jóhann Árni með fyrirgjöf sem fer af varnarmanni og aftur fyrir. Hornspyrna sem gestirnir fá.

Núna sækir Stjarnan í átt að rennibrautinni í Vatnaveröld.

xG: Keflavík 0,77 - 1,29 Stjarnan
Skot: Keflavík 7 - 7 Stjarnan
Skot á markið: Keflavík 5 - 1 Stjarnan
Snertingar í teig andstæðings: Keflavík 17 - 13 Stjarnan
Með bolta: Keflavík 45,2% - 54,8% Stjarnan

Mjög athyglisverð tölfræði þar sem mér finnst Keflavík hafa verið sterkari aðilinn og hættulegri.

Búið að flauta til hálfleiks. Að mínu mati sanngjörn staða. Keflavík byrjaði mun betur og fékk fullt af færum, svo átti Stjarnan fínan kafla en Keflavík endaði hálfleikinn betur og leiðir að honum loknum.

Jæja, hann er kominn í vesti aftur. Sýnist þetta vera Haukur Brink.

Stjarnan er að undirbúa skiptingu rétt fyrir leikhlé. Mjög spes að eyða stoppi þegar svona stutt er í hálfleik.

Breki Baxter með hættulega fyrirgjöf en Gummi Kristjáns er fyrstur á boltann.

Aftur er það Alghoul sem reynir, núna með þrumuskot fyrir utan teig sem fer þó vel fram hjá markinu.

Alghoul með skot að marki sem Árni Snær ver frekar auðveldlega.

Örvar og Birnir búnir að skipta um kant, Örvar kominn út hægra megin og Birnir vinstra megin.

Stjörnumenn eru að sækja í sig veðrið! Guðmundur Baldvin tekur aukaspyrnu inn á teiginn og boltinn fer af Andra Rúnari og stefnir í markið, en Nacho Heras er mættur til að bjarga á línu!

Örvar Eggerts reynir skot fyrir utan teig en það fer langt yfir markið, aldrei séns.

Örvar Logi með boltann fyrir markið en Axel Ingi er réttur maður á réttum stað og kemur honum frá.

Stjarnan vinnur boltann hátt á vellinum og í kjölfarið fær Birnir Snær helvíti fínt færi, en setur boltann fram hjá. Skotvinkillinn kannski smá þröngur þarna.

Keflavík hefur sankað að sér 0,38 í xG á þessum fyrstu mínútum leiksins á meðan Stjarnan er með 0,01.

Miðað við færin finnst mér xG-ið hæglega getað verið meira hjá heimamönnum.

Fær hér annað skotfæri við teiginn, nær góðum krafti í skotið en það er beint á Árna Snæ sem ver boltann út í teiginn. Keflvíkingar þó ekki alveg nógu grimmir.

Ljubicic á að vera búinn að skora tvö, ef ekki þrjú mörk hérna.

Keflvíkingar með boltann inn á teiginn og hann fellur í teignum fyrir Stefan Ljubicic sem er í mjög fínu færi en skot hans fer í varnarmann!

Daníel Finns með háloftabolta inn á teiginn sem Ásgeir Orri grípur þægilega.

Bekkurinn hjá Stjörnunni er mjög ungur í dag, meðalaldurinn 19 ár. Þar er meðal annars einn 15 ára og einn 14 ára gamall leikmaður. Á meðan er varamannabekkurinn hjá Keflavík talsvert eldri.

Athyglisvert að Birnir Snær er með nýtt númer á bakinu í dag, er númer 14 en er búinn að vera númer 11 hingað til í sumar.

Stjörnumenn mega prísa sig sæla að vera ekki búnir að fá á sig mark hérna.

Aftur er Keflavík að komast í gott færi. Dagur Ingi fær boltann við vítateiginn eftir klaufagang hjá Stjörnumönnum en nær ekki að koma skoti á markið.

Hérna fá heimamenn dauðafæri! Vel spilað hjá Keflvíkingum, finna Dag Inga á bak við vörnina og hann leggur hann út í teiginn á Stefan Ljubicic sem er í stórkostlegu færi en skotið hans er skelfilegt og beint á Árna Snæ.

Keflvíkingar eru að byrja þetta mjög vel og þarna áttu þeir að komast yfir.

Keflvíkingar byrja þetta strax af krafti og Eiður Orri er næstum því kominn í gott skotfæri en leikmaður Stjörnunnar er á undan honum í boltann.

Liðin eru að ganga hér til leiks.

Það er alveg ágætis stemning hér í Keflavík. Hamborgarakeimurinn umlykur svæðið þegar stutt er í upphafsflaut.

Sunny Kef á vel við hér í dag, það er sól en það er líka talsverður vindur sem gæti gert liðunum erfitt fyrir. Grasið lítur bara nokkuð vel út, allavega miðað við hvernig það var um daginn.

Gunnar Freyr Róbertsson er með flautuna hér í dag. Honum til aðstoðar eru Eðvarð Þór Eðvarsson og Jovan Subic. Fjórði dómari er Guðmundur Páll Friðbertsson og eftirlitsmaður er Oddur Helgi Guðmundsson.

Þorlákur Breki Baxter hefur komið mjög sterkur inn í lið Keflavíkur í upphafi tímabilsins en hann gekk í raðir félagsins frá Stjörnunni fyrir tímabilið. Hann fékk ekki mörg tækifæri í Garðabænum og ætlar væntanlega að sýna sig og sanna hér í kvöld.

Það er spurning hvort Keflavík og Stjarnan hafi gert eitthvða samkomulag þegar Alpha Conteh fór yfir til Keflavíkur um að Keflvíkingar mættu nota hann fyrir einhverja upphæð. Keflvíkingar gerðu það til að mynda með Davíð Helga Aronsson sem kom á láni frá Víkingum.

12. Árni Snær Ólafsson (m)
5. Guðmundur Kristjánsson (f)
6. Sindri Þór Ingimarsson
7. Örvar Eggertsson
8. Jóhann Árni Gunnarsson
14. Birnir Snær Ingason
18. Guðmundur Baldvin Nökkvason
19. Daníel Finns Matthíasson
22. Emil Atlason
32. Örvar Logi Örvarsson
99. Andri Rúnar Bjarnason

Hjá Stjörnunni byrja bæði Emil Atlason og Andri Rúnar Bjarnason og munu varnarmenn Keflavíkur hafa nóg að gera með þá tvo.

1. Ásgeir Orri Magnússon (m)
3. Axel Ingi Jóhannesson
4. Nacho Heras (f)
5. Davíð Helgi Aronsson
7. Dagur Ingi Valsson
8. Þorlákur Breki Þ. Baxter
10. Stefan Ljubicic
11. Muhamed Alghoul
20. Marin Brigic
22. Ásgeir Páll Magnússon
23. Eiður Orri Ragnarsson

Það er ein breyting á milli leikja hjá Keflavík. Alpha Conteh er á láni hjá Keflavík frá Stjörnunni og má ekki spila þennan leik. Dagur Ingi Valsson kemur inn í hans stað.

Kári Sigfússon, leikmaður Fylkis, er spámaður umferðarinnar á Fótbolta.net. Hann er kannski ekki hlutlaus þegar kemur að þessum leik þar sem hann er fyrrum leikmaður Keflavíkur og átti stóran þátt í því að liðið komst upp á síðasta tímabili.

Keflavík 1 - 0 Stjarnan
Iðnaðarsigur á grasinu hjá mínum mönnum, ég er ekki frá því að Halli Gumm fái sér einn bauk eftir leik.

Stjarnan vann sterkan sigur gegn KR í Mjólkurbikarnum á dögunum, 2-1, þar sem Jökull Elísabetarson, þjálfari liðsins, keypti sér smá andrúm. Það er spurning hvort sá sigur gefi Stjörnumönnum byr undir báða vængi.

Stjarnan er sæti neðar en Keflavík, í áttunda sæti með sex stig. Stjarnan byrjaði á tveimur sigrum en hafa svo tapað fjórum deildarleikjum í röð sem er í raun óásættanlegt fyrir Garðbæinga. Það er búið að leggja mikið í lið Stjörnunnar og var krafa gerð fyrir mót að þetta lið færi í titilbaráttu. Þeir eru núna hins vegar 13 stigum frá toppnum þegar mótið er rétt byrjað.

Keflavík hefur komið skemmtilega á óvart í upphafi tímabilsins og er með sjö stig eftir sex leiki. Það voru allir að spá þeim falli fyrir tímabilið en miðað við þessa byrjun eru önnur lið líklegri. Frammistaðan hefur verið flott hjá Keflvíkingum og unnu þeir til að mynda mjög svo sanngjarnan 1-3 sigur gegn ÍA í síðustu umferð.

Það er heil umferð í Bestu deildinni í dag. Við byrjuðum í Vestmannaeyjum þar sem Víkingar sóttu sigur. Svo eru þetta hinir leikirnir:

sunnudagur 17. maí
16:00 Þór-ÍA (VÍS völlurinn)
17:00 FH-KA (Kaplakrikavöllur)
17:30 Keflavík-Stjarnan (HS Orku völlurinn)
18:15 Valur-Breiðablik (N1-völlurinn Hlíðarenda)
18:15 KR-Fram (Meistaravellir)

Og verið velkomnir kæru lesendur í beina textalýsingu frá leik Keflavíkur og Stjörnunnar í Bestu deild karla. Hér munum við fylgjast með gangi mála á HS Orku vellinum en flautað verður til leiks klukkan 17:30.