Þróttarar hafa í gegnum árin verið í vandræðum gegn Leikni og stigasöfnunin gegn Breiðhyltingum ekki verið góð. Það mynstur heldur áfram. Flestir bjuggust við sigri Þróttar í kvöld en Leiknismenn fagna stiginu. Þróttarar fengu fleiri marktækifæri en gerðu á endanum ekki nóg til að vinna leikinn.

Kári Kristjánsson átti stangarskot í fyrri hálfleik, í innanverða stöngina og útaf hinumegin. Eðlisfræðin kom manni í opna skjöldu og ótrúlegt að þetta hafi ekki verið mark.

Fyrstu stigin sem Þróttur missir af í sumar en liðið er áfram á toppnum og 10 stig af 12 mögulegum er uppskera sem lítið er hægt að kvarta yfir. Leiknismenn eru komnir með fimm stig og fara sæmilega af stað á tímabilinu.

Þróttarar naga sig í handarbökin yfir því að hafa ekki farið betur með færin því þeir áttu svo sannarlega að skora fleira en eitt mark í dag. Tvívegis hafnaði boltinn í stönginni.

Dómararnir voru ekki í aðalhlutverki í dag og það er ekkert nema jákvætt.