Svakaleg dramatík í lokin en sigur Keflvíkinga staðreynd og sigurinn var sanngjarn.

Þórsarar eru að fá víti!

Keflavík fær hornspyrnu en Alghoul sparkar boltanum beint aftur fyrir endamörk.

Stuðningsmenn beggja liða taka við sér.

Þórsarar fá hornspyrnu en skalla boltann aftur fyrir.

Þórsarar eru heldur betur að banka.

Atli Sigurjóns með góða spyrnu inn á teiginn og boltinn dettur fyrir Ásbjörn Líndal. Hann fer í skotið en það fer í varnarmann Keflavíkur. Mögulega var þetta besta færi Þórsara í leiknum til þessa.

Ásgeir Páll í frábæru skallafæri eftir hornspyrnu en hann hittir hann ekki almennilega.

Alpha Conteh tekur sprettinn upp völlinn en hættir svo á miðri leið, alveg búinn á því.

Tíu mínútur eftir af venjulegum leiktíma.

Þórsarar eru hættulegri þessa stundina. Eiga hér fyrirgjöf sem Ásgeir Orri gerir vel í að grípa.

Atli Sigurjóns með hörkuskot að marki en lítið vandamál fyrir Ásgeir Orra samt sem áður.

Breki Baxter fékk höfuðhögg og liggur eftir.

Sebastian Haugland fær boltann og tekur vel á móti honum. Hann leggur hann svo á Fannar Daða sem kemur á ferðinni og er kominn í mjög gott færi. Hann nær ágætis skoti en Ásgeir Orri sér við honum!

Keflvíkingar fá tvær hornspyrnur. Sú seinni endar með því að Breki Baxter á skot að marki sem fer í varnarmann.

Ljubicic er heldur betur duglegur að koma sér í færi. Á hér skot sem fer af varnarmanni og fram hjá.

Þetta var fyrsta marktilraun Þórsara í leiknum en hún kemur eftir 66 mínútur.

Loksins komast Þórsarar í álitlega stöðu. Komast aftur fyrir vörnina og Atli Sigurjóns er ekki langt frá því að skora. Marin Brigic lokaði vel þarna.

Siggi Höskulds hendir í þrefalda breytingu. Kveikir þetta í Þórsurum?

Stefan Ljubicic með skot lengst yfir markið.

Atli Sigurjóns með boltann fyrir en Ásgeir gerir frábærlega í að koma út og grípa.

Keflavík er með 2,08 á meðan Þórsarar halda í 0,00.

Þórsarar með fyrirgjöf sem fer rétt fram hjá markinu. Spurning hvort þetta skráist sem skot?

Alpha Conteh með lipra takta og sendir hann fyrir markið þar sem Aron Birkir slær boltann út í teiginn en Þórsarar bjarga sér fyrir horn.

Stefan Ljubicic fær hér algjört dauðafæri, nánast bara einn á móti marki en einhvern veginn nær Aron Birkir að koma sér fyrir og verja. Þetta var ekki góð afgreiðsla.

Ljubicic verður að fara að klára þessi færi sem hann er að fá.

Þórsarar með bolta inn á teiginn sem Ásgeir Orri gerir vel í að kýla frá markinu.

Breki Baxter núna með skot sem fer vel fram hjá markinu.

Keflvíkingar byrja seinni hálfleikinn á að fá hornspyrnu sem Aron Birkir nær til og Þórsarar fá markspyrnu svo.

Við erum komin aftur af stað!

Ég vil taka það fram að ég var ekki sofandi frá mínútu 6 til 34 þó það líti þannig út ef textalýsingin er skoðuð núna. Það var fullt af færslum til staðar en þær af einhverri ástæðu hurfu allar. Leiðindamál en svona er þetta bara.

Skot: Keflavík 8 - 0 Þór
Skot á mark: Keflavík 3 - 0 Þór
xG: Keflavík 1,30 - 0,00 Þór
Snertingar í teig andstæðings: Keflavík 15 - 4 Þór
Með bolta: Keflavík 53% - 47%
Hornspyrnur: Keflavík 4 - 2 Þór

Það er kominn hálfleikur og heimamenn leiða mjög sanngjarnt. Ég skal sanna það með tölfræði eftir smá.

Þórsarar í bullandi brasi en boltinn fer aftur fyrir í hornspyrnunni.

Keflvíkingar fá hornspyrnu þegar uppbótartíminn hefst.

Atli Sigurjóns með hornspyrnu sem fer yfir allan pakkann og í innkast hinum megin á vellinum.

Það er rosalega mikið haldið í Stefan Ljubicic og hér er loksins flautað á það. Keflvíkingar í stúkunni fagna kaldhæðnislega að það sé loksins flautað á þetta.

Úðarinn allt í einu kominn í gang hér á hliðinni. Skrautlegt en þeir eru fljótir að slökkva á honum.

Þórsarar hafa ekki enn átt marktilraun og staðan er 1,30 - 0,00 í xG-bardaganum. Segir svolítið mikið um sögu leiksins.

Færið sem Alghoul fékk áðan var 0,57 í xG. Erfitt að klúðra því.

Keflavík er enn að stjórna ferðinni en Þórsarar eru að vinna sig meira inn í leikinn og voru að fara illa með ágætis stöðu hérna rétt áðan.

Einhverjar smá tæknilegir örðugleikar þar sem fjöldinn allur af færslum hefur horfið úr kerfinu.

Alghoul með hornspyrnu sem er skölluð frá. Keflvíkingar koma boltanum aftur inn á teiginn og Nacho rétt missir af honum!

Eiður Orri með skot Arnar Birkir ver í horn. Núna fær Keflavík hornspyrnu.

Þórsarar fá fyrstu hornspyrnu leiksins en Keflvíkingar hreinsa frá.

Alpha Conteh kemur inn í liðið frá 1-1 jafnteflinu gegn Stjörnunni en hann mátti ekki spila þann leik þar sem hann er í láni frá Garðabæjarfélaginu. Hann kemur inn fyrir Dag Inga Valsson.

Þetta er farið af stað!

Liðin eru að ganga út á völl. Þórsarar eru byrjaðir að láta í sér heyra!

Ívar Orri Kristjánsson er dómari þessa leiks. Honum til aðstoðar eru Birkir Sigurðarson og Kristófer Bergmann úr Kópavogi. Eftirlitsmaður er Frosti Viðar Gunnarsson og fjórði dómari er Róbert Þór Guðmundsson.

Hvernig nær Þór í góð úrslit á móti Keflavík?

„Það fyrsta sem þarf að gerast er að menn mæti á svæðið með rétt hugarfar. Eins og allir vita þá hefur Keflavík átt fína byrjun á tímabilinu, þeir eru með tveimur stigum meira en við í deildinni og eru með öflugan heimavöll sem við höfum átt í erfiðleikum með að koma á síðustu tvö ár. Við gerðum jafntefli í fyrra og töpuðum þar á undan. Við förum og spilum okkar leik, við þurfum að laga það sem fór úrskeiðis í síðasta leik. Það var hugarfarslegs eðlis, vantaði upp á ákefðina sem er alls ekki það sem við viljum standa fyrir og alls ekki það sem mun koma okkur á þann stað sem okkur langar að vera á."

Hefur spilamennska Keflavík komið þér á óvart miðað við það sem þú sást í fyrra?

„Nei, alls ekki. Keflavík er með mjög góðan hóp og eru óhræddir. Þeir þora að spila sinn leik, vita nákvæmlega hvað þeir standa fyrir og spilamennskan kemur mér ekki á óvart. Þeir eru taktískt öflugir, eru með fína reynslu í liðinu, þekkja leikstílinn sinn í húð og hár. Þetta er vel smurð vél sem tikkar og það hjálpar mikið."

Hvernig leggst það í þig að mæta Þórsurum sem hafa tapað fjórum leikjum í röð?

„Þórsararnir hafa sýnt góða leiki, unnu Val og svo Framarana, voru í hörkuleik á móti KA sem er kannski smá leikur utan sviga (verandi nágrannaslagur). Ég held það sé rosalega mikilvægt fyrir okkur að fara ekki út úr því sem við erum að gera, halda áfram því sem við höfum gert í byrjun móts. Við erum á heimavelli og viljum spila skemmtilegan fótbolta, en við þurfum að halda í gildin sem við höfum verið með. Þá náum við vonandi í góð úrslit," segir Halli.

Á hverju er þetta að fara ráðast?

„Við þurfum að mæta með höfuðið skrúfað rétt á og tilbúnir í bardaga. Það eru allir leikir erfiðir í þessari deild, hvern og einn á sinn hátt. Við þurfum að hafa fyrir öllu og þá þyrstir örugglega í sigur. Ég býst við hörkuleik og vonandi skemmtilegur."

Það er heldur betur farið að styttast í leikinn. Hamborgarakeimurinn umlykur allt og það er mikil stemning í lofti. Það er smá rigning í Keflavík og það eru bara prímaaðstæður fyrir góðan fótboltaleik hérna í kvöld.

Sæbjörn Steinke, stundum kallaður Steinkegeitin, gerði sér lítið fyrir og ræddi við báða þjálfarana í aðdraganda þessa leiks. Hérna eru tenglar á viðtölin og ég hvet fólk eindregið til að glugga yfir þau fyrir leikinn:

Fylkismaðurinn Ragnar Bragi Sveinsson er spámaður umferðarinnar á Fótbolta.net en hann spáir heimasigri í þessum leik.

Keflavík 3 - 1 Þór
Komast snemma í 2-0, Þór minnkar muninn og svo mun Davíð sigla þessu heim fyrir Kef.

Þegar liðin mættust hérna í Keflavík í fyrra var niðurstaðan 2-2 jafntefli þar sem varnarmennirnir Ásgeir Páll Magnússon og Marin Brigic skoruðu fyrir Keflavík á meðan Christian Greko Jakobsen og Sigfús Fannar Gunnarsson skoruðu fyrir Þór. Allir þessir leikmenn byrja í dag. Fyrir norðan var það Keflavík sem hafði betur, 2-4, og skoraði Gabríel Aron Sævarsson tvö mörk í þeim leik en hann spilar í dag með Haukum. Sigfús Fannar skoraði í báðum leikjunum gegn Keflavík í fyrra og spurning hvað hann gerir í dag.

Það var meiri trú á Þór fyrir mót en þeim var samt sem áður spáð í fallbaráttu. Þórsarar fóru ágætlega af stað en hafa verið mjög kaldir að undanförnu og tapað fjórum leikjum í röð. Síðasti leikur hjá þeim var 1-2 tap gegn ÍA á heimavelli þar sem Sigurður Heiðar Höskuldsson, þjálfari liðsins, var verulega ósáttur við fyrri hálfleikinn hjá sínum mönnum.

Það var minni trú á Keflavík en Þór áður en tímabilið hófst og var Keflvíkinum spáð niður í nánast öllum spám en þeir hafa verið flottir það sem af er sumri og spilað flottan fótbolta. Þeir sitja í áttunda sæti með átta stig en þeir gerðu 1-1 jafntefli gegn Stjörnunni í síðasta leik eftir að hafa unnið góðan 1-3 útisigur á ÍA þar áður.

Við erum að fara að fá hérna í kvöld nýliðaslag en þetta eru liðin tvö sem komust upp úr Lengjudeildinni á síðasta tímabili. Þór vann deildina á meðan Keflavík komst upp í gegnum umspilið þar sem þeir unnu HK á Laugardalsvelli.

Verið velkomnir kæru lesendur í beina textalýsingu frá leik Keflavíkur og Þórs í Bestu deild karla. Flautað verður til leiks klukkan 18:00 og munum við fylgjast með gangi mála hérna.


Áttunda umferðin hófst í gær með 2-2 jafntefli ÍA og ÍBV. Í kvöld lýkur umferðinni svo með fimm leikjum.

   22.05.2026 14:59

Sjáðu mörkin: Þrususpyrna Gísla Laxdals í 2-2 jafntefli ÍA og ÍBV

Föstudagur 22. maí
Besta karla
18:00 KA-Valur (Greifavöllurinn)
18:00 Keflavík-Þór (HS Orku völlurinn)
19:15 Víkingur R.-FH (Víkingsvöllur)
19:15 Stjarnan-Fram (Samsungvöllurinn)
19:15 Breiðablik-KR (Kópavogsvöllur)