Draumamark undir lok leiks skilur liðin að. Mikilvægur sigur fyrir heimamenn.

Langt innkast og Franz á skalla yfir mark heimamanna.

Laus bolti inn á teignum en gestirnir ná ekki skoti. Þróttarar fá horn í kjölfarið. Ekkert kom upp úr því.

Eiður Jack Erlingsson reynir að finna fjærhornið á marki Dalvíkur en setur boltann rétt framhjá. Mjög fínt færi.

Elvar Máni fær boltann inn á teig Þróttara en setur boltann yfir mark gestanna.

Franz kemst einn gegn einum á móti Þresti, kýs að taka hann ekki á og lætur vaða fyrir utan teig en skotið er þægilegt fyrir Auðun.

Jóhannes Karl Bárðarson með tilraun úr aukaspyrnu en hann dregur boltann framhjá marki heimamanna.

Eyþór Orri Ómarsson í mjög fínu færi en Auðunn Ingi gerir vel að verja. Gestirnir fá horn sem Þröstur skallar í burtu.

Áki Sölvason með skot hægra megin úr teig Þróttara, reynir að finna fjærhornið en skotið fer framhjá.

Benóný Haraldsson í dauðafæri, laus bolti fellur fyrir hann inn á teignum, en Þröstur Mikael Jónasson hendir sér fyrir og bjargar því að þetta fari á markið.

Jóhannes Karl Bárðarson með mikið bjartsýnisskot, hátt yfir mark heimamanna.

Leikurinn stöðvaður. Gunnlaugur Rafn Ingvarsson liggur eftir og einnig leikmaður gestanna. Gestirnir ósáttir með tímasetninguna á flautinu.

Freyr Jónsson með skot úr D-boganum, skotið af varnarmanni og rétt framhjá. Dalvík fær svo þrjá sénsa eftir hornið en heimamenn ná ekki að skora.

Mjög rólegum fyrri hálfleik lokið. Góðu fréttirnar eru þær að skýin eru horfin. Bongó á Dallas.

Haukur Darri Pálsson með frábæra sendingu inn á Eið Jack Erlingsson. Hann er einn í gegn á móti markverði Dalvíkinga, Auðuni Inga, sem gerir mjög vel og lokar á Eið.

Anton Breki Óskarsson brýtur á Frey Jónssyni við vítateig gestanna. Gott skotfæri fyrir Áka. Skot beint í miðjan vegginn, léleg tilraun.

Benóný Haraldsson tekur aukaspyrnu, skot/sending inn á teiginn sem Auðun Gauti Auðunsson reynir að stýra í netið en boltinn í hendur Auðuns í marki heimamanna.

Áki Sölvason með fast skot fyrir utan teig sem fer yfir mark gestanna.

Máni Dalstein Ingimarsson með fyrirgjöfina, Hektor í fínu færi en hittir ekki mark gestanna með skallanum.

Gestirnir úr Vogum byrja með boltann. Dalvík með vindi í fyrri.

Allt hefðbundið í treyjum, Dalvíkingar í bláu og Þróttarar í appelsínugulu.

Það er smá gustur en sólin kíkir við og við. Auðun þjálfari og svona 20 aðrir mættir í stúkuna þegar fimm mín eru í leik.

Auðun Helgason, þjálfari Þróttar Vogum, verður ekki á hliðarlínunni í dag þar sem hann tekur út leikbann.

Dalvík/Reynir er með fjögur stig eftir fyrstu fimm leikina og situr í fallsæti fyrir leiki dagsins. Þróttarar eru með sjö stig. Þróttur gerði jafntefli við Kormák/Hvöt í síðustu umferð en Dalvíkingar töpuðu stórt gegn Kára.

Góðan daginn lesendur góðir og veriði velkomnir í beina lýsingu frá leik Dalvíkur/Reynis og Þróttar Vogum í 2. deild karla. Allra helstu upplýsingar frá leiknum koma hér inn í lýsinguna; mörk, spjöld, dauðafæri og skiptingar. Athygli er vakin á því að hægt er að horfa á leikinn á Livey.