SKÝRSLAN: Draumur á Dalvík
Hvað réði úrslitum?
Leikurinn var heilt yfir nokkuð jafn og lokaður, veðrið var allavega betra en leikurinn. Mér leið eins og Dalvík hafi átt fleiri tilraunir í heildina en gestirnir úr Vogum fengu jafnvel betri færi. Það var draumamark undir lok leiks sem réði úrslitunum.
Bestu leikmenn
1. Máni Dalstein Ingimarsson
Átti heilt yfir góðan leik í hægri bakverðinum, er yfirleitt miðvörður en leysti þessa stöðu vel. Þegar boltinn kom svo til hans á 88. mínútu hafði hann nægt sjálfstraust til að láta bara vaða.
2. Auðunn Ingi Valtýsson
Lokaði einu sinni mjög vel einn á móti einum í fyrri hálfleik og varði aftur mjög vel í seinni. Fékk á sig sex mörk í síðasta leik en lét það ekki á sig fá.
Atvikið
Draumamarkið undir lokin, heimamenn áttu flottan spilkafla í aðdraganda marksins sem hefði líklegast verið besta syrpa leiksins ef skot hefði náðst. Boltinn barst svo út fyrir teig þar sem Máni frá Skeiði, uppalinn Dalvíkingur, komst í hann og hann þrumaði boltanum upp í nærhornið. Frábært skot og hans fyrsta meistaraflokksmark.
Hvað þýða úrslitin?
Dalvíkingar með sinn fyrsta sigur síðan í fyrstu umferð og væntanlega minnkar stemingiin um sjómannahelgina ekki við það. Dalvíkinga jafna Þróttara að stigum í 6.-9. sæti deildarinnar, bæði lið með sjö stig. Næsta umferð verður öll spiluð á miðvikudag.
Vondur dagur
Set þetta á Eið Jack fyrir að hafa ekki klárað dauðafærið í fyrri hálfleik.
Dómarinn - 7
Fannst Ronnarong dæma þennan leik heilt yfir fínt.