Hilmir Rafn: Vorum klárlega betri aðilinn í dag

Hilmir var svekktur eftir 1-1 jafntefli gegn Grikklandi á Þróttaravelli í dag. Hann skoraði mark íslenska liðsins en Grikkir jöfnuðu undir lok leiksins.

„Þetta er auðvitað svekkjandi. Við vorum með leikinn í okkar höndum en svo kom smá kæruleysi í lokin. Við gáfum þeim aukaspyrnu á hættulegum stað sem þeir nýttu sér. Þetta er eitthvað sem við getum lært af og tekið með okkur í seinni leikinn.“

Þetta er bara það sem ég á að gera
Hilmir var ánægður með að hafa lagt sitt af mörkum með marki sínu.

„Þetta er bara það sem ég á að gera. Mitt hlutverk er að hjálpa liðinu og ég er mjög ánægður með að geta hjálpað liðsfélögum mínum.“

Ísland klárlega betri aðilinn
Mikil snjókoma setti svip sinn á leikinn en Hilmir var ánægður með spilamennskuna.

„Þetta gerði þetta erfiðara en mér fannst við samt spila ágætis fótbolta. Við vorum klárlega betri aðilinn í dag og vonandi verður það eins í seinni leiknum.“