„Standið er mjög gott, ég held að það sé enginn meiddur og ekkert vesen," sagði Ragnar Sigurðsson í samtali við Fótbolta.net fyrir landsliðsæfingu íslenska landsliðsins í morgun.
Íslenska liðið hefur varist vel og einungis fengið á sig 3 mörk í þeim 8 leikjum sem hafa verið spilaðir.
„Þetta er ekkert bara ég og Kári, við erum með bakverði, miðjumenn og framherja og sérstaklega náttúrulega miðjumennirnir og framherjarnir gera þetta mjög auðvelt fyrir þetta og svo hefur Hannes verið með nokkrar frábærar vörslur."
„Við erum komnir áfram og þurfum ekkert að pæla meira í því, nú getum við einbeitt okkur að þessum leikjum og klárað þá með stæl og vinna riðilinn," sagði Ragnar einbeittur.
Félagslið Ragnars, FC Krasnodar í Rússlandi hafa farið brösulega af stað á tímabilinu og sitja í 9.sæti með 14 stig.
„Okkur gengur hörmulega, við misstum eiginlega tvo bestu mennina sem voru á láni hjá okkur og það hefur sýnt sig í spilinu hjá okkur. Við erum í einhverju lélegu mómenti."
„Við vitum helling um Lettana og vitum hvernig þeir eru búnir að vera að spila, en þeir gætu breytt um leikstíl á laugardaginn maður veit ekkert."
Athugasemdir
