,,Stemningin í hópnum er hrikalega góð. Það er alltaf auðvelt að gíra sig upp til að spila Evrópuleik. Við tókum góða æfingu í gær eftir langt ferðalag. Aðstæður hér eru allar mjög fínar. Völlurinn sem við spilum á leit mjög vel út og svo verður góð tilbreyting að spila í 25 stiga hita,” sagði Kristján Gauti aðspurður út í aðstæður í Hvíta-Rússlandi.

Íslenskir knattspyrnu áhugamenn þekkja að öllum líkindum ekki mikið til knattspyrnunnar í Hvíta-Rússlandi. Kristján Gauti segir að FH-liðið viti lítið út í hvað þeir séu að fara en telur möguleikana vera til staðar að ná góðum úrslitum.

,,Það er alveg klárt að við þurfum að spila góðan varnarleik í dag og vera skynsamir til að byrja með. Þetta lið beitir mikið af skyndisóknum svo við verðum að vera vel skipulagðir.”

,,Ég tel okkur alveg eiga raunhæfa möguleika á að ná hagstæðum úrslitum. Við sýndum það í fyrra að við getum náð langt í Evrópukeppnum og við munum gera allt sem við getum til að endurtaka það,” sagði Kristján Gauti að lokum.