Bosnía tapaði fyrir Kýpverjum í fyrstu umferð og gerði jafntefli við Wales og Belgíu eftir það. Það var á sunnudaginn sem Ísrael sló Bosníu svo gott sem úr leik.

,,Það verður erfitt að komast á Evrópumótið 2016 og hefur stjórn knattspyrnusambandsins ákveðið að reka Safet Susic þjálfara og aðstoðarmenn hans," stendur í yfirlýsingu frá bosníska knattspyrnusambandinu.

Susic stýrði Bosníu á HM 2014 en kom liðinu ekki upp úr riðli og hætti þjálfun. Þjálfarinn var þá beðinn um að hætta ekki þjálfun og halda áfram með landsliðið, en nú hefur hann verið rekinn þvert gegn eigin vilja.

,,Ég vil ekki hætta því ég held að það sé enn mögulegt að komast á EM. Það er ekki mikill möguleiki en það er möguleiki," sagði Susic.