Freyr var ánægður með liðið sitt sem byrjar undankeppni HM á stórum sigri
„Við hefðum getað gert betur oft á köflum en þetta var bara fínt. Ég er ánægður með mjög margt í þessum leik,“ sagði landsliðsþjálfarinn Freyr Alexandersson eftir 8-0 sigur á Færeyjum í fyrsta leik undankeppni HM.
Lestu um leikinn: Ísland 8 - 0 Færeyjar
„Mér fannst við gera þetta af fagmennsku. Við vorum þolinmóð. Það er auðvelt að missa taktinn og fara út í einhverja hluti sem að maður á ekki að vera að reyna. Við vorum að æfa hluti sem við þurfum að ná tökum á,“ sagði Freyr.
Næsta verkefni Íslands er öllu meira krefjandi en það eru útleikir gegn Þýskalandi og Tékklandi sem spilaðir verða eftir mánuð.
„Það er allt annað verkefni. Það horfir vel við mér. Ég hlakka mikið til. Við þurfum að undirbúa okkur vel,“ sagði landsliðsþjálfarinn meðal annars en hægt er að horfa á allt viðtalið við hann í sjónvarpinu hér að ofan.
Þar kemur hann meðal annars inná það jákvæða sem liðið tekur með sér úr þessum leik, frammistöðu markaskorarans Elínar Mettu og nýja leikstöðu Ingibjargar sem hægri bakvörður.
Athugasemdir
