Það er stór helgi framundan í spænsku úrvalsdeildinni, helgi sem margir hafa beðið spenntir eftir.

Umferðin hefst í kvöld en þá heimsækir Granada stórlið Sevilla. Sverrir Ingi Ingason tekur út leikbann hjá Granada sem er í skítamálum í deildinni.

Laugardagurinn byrjar snemma fyrir þyrsta knattspyrnuáhugamenn en þá mætast Malaga og Valencia í hörkuleik.

Síðasti leikur kvöldsins er upphitun fyrir sunnudagsleikinn en þá hefst fyrri baráttan á milli Barcelona borgar og höfuðborgarinnar Madrid þegar Atletico Madrid heimsækir Espanyol.

Sunnudagurinn er dagurinn sem allir hafa beðið eftir, en þá er sannkallaður stórleikur, hinn eini sanni El Clasico leikur erkifjendanna Real Madrid og Barcelona. Leikurinn er afar mikilvægur fyrir bæði lið, og þá sérstaklega Barcelona.

Börsungar féllu úr Meistaradeild Evrópu í vikunni og þeir geta nánast kvatt spænska meistaratitilinn takist þeim ekki að sigra á sunnudagskvöld.