Ólafur Jóhannesson, þjálfari Vals, var ánægður eftir 4-0 sigur sinna manna gegn Þrótti í Pepsi-deildinni í kvöld.
Lestu um leikinn: Þróttur R. 0 - 4 Valur
„Við komum bara fínir inn í þennan leik, vel stemmdir og gott hugarfar og uppskárum góðan sigur. Mér fannst við hafa töglin og hagldirnar lungan af leiknum. Auðvitað vissum við að þeir væru að berjast fyrir lífi sínu og stundum er erfitt að fókusera gegn svoleiðis liðum en við gerðum það mjög vel og kláruðum leikinn," sagði Ólafur við Fótbolta.net.
„Við getum spilað ágætis fótbolta þegar sá gállinn er á okkur," bætti hann við þegar hann var spurður út í mikla markaskorun sinna manna.
Valsmenn hafa þegar tryggt sér Evrópusæti með því að verða bikarmeistarar en hafa þrátt fyrir það unnið tvo deildarleiki samtals 11-0 í kjölfarið.
„Við verðum að sýna deildinni virðingu, bæði öðrum liðum og deildinni, þannig við förum alltaf inn í leikina til að gera okkar besta," sagði Ólafur.
Vel heyrðist í Ólafi á hliðarlínunni úr blaðamannaskýlinu og virtist honum nokkuð heitt í hamsi undir lok leiks þó að hans menn væru vel yfir.
„Ég er nú bara eins og ég er. Það er ekkert hægt að fara að diskútera það, stundum segi ég eitthvað og stundum ekki, það er nú bara eins og það er," sagði Ólafur.
Athugasemdir