Rúnar Alex Rúnarsson stóð vaktina í marki Nordsjælland er liðið gerði jafntefli í Álaborg í dönsku úrvalsdeildinni í dag.

Nordsjælland náði forystunni strax á fjórðu mínútu þegar miðjumaðurinn Mathias Jensen skoraði.

Staðan var 1-0 í hálfleik fyrir gestina í Nordsjælland en snemma í seinni hálfleiknum fengu heimamenn í Álaborg vítaspyrnu sem rataði fram hjá Rúnari Alex í marki Nordsjælland, 1-1.

Ekki voru fleiri mörk skoruð eftir þetta en Rúnar Alex og félagar léku manni færri síðustu mínúturnar.

Nordsjælland er í þriðja sæti dönsku úrvalsdeildarinnar, 10 stigum á eftir toppliði Midtjylland.