Tveir leikmenn úr Bestu deild kvenna hafa fengið félagaskipti til Danmerkur á síðustu dögum. Það eru þær Málfríður Anna Eiríksdóttir og Sunneva Hrönn Sigurvinsdóttir.
Málfríður hefur leikið allan sinn feril með Val. Hún er í námi í Danmörku og mun spila með B93 út tímabilið í Danmörku. Það kom fyrst fram á mbl.is.
Málfríður hefur leikið allan sinn feril með Val. Hún er í námi í Danmörku og mun spila með B93 út tímabilið í Danmörku. Það kom fyrst fram á mbl.is.
„Það er mjög sennilegt að ég verði eitthvað með Val í sumar. Ég er ekki búin að skrifa undir samning þannig að ég mun geta skipt aftur í sumar," sagði Málfríður í samtali við mbl.is í gær.
Málfríður bar fyrirliðabandið í lok síðasta tímabils eftir að Elísa Viðarsdóttir steig til hliðar þar sem Elísa á von á barni. B93 er í Kaupmannahöfn og er sem stendur í níunda sæti af tólf liðum í dönsku B-deildinni.
Fótbolti.net hafði samband við Sunnevu í dag og staðfesti hún að hún væri búin að skrifa undir hjá AGF. Hún hefur spilað með FH undanfarin þrjú ár.
Sunneva er 26 ára og var hún í skemmtilegu viðtali við Fótbolta.net síðasta sumar þegar hún var valin í A-landsliðið.
Kærasti hennar er í mastersnámi í Árósum og ákvað hún að flytja út til hans og spila með AGF út tímabilið.
AGF er í sjötta sæti efstu deildar og verður í efra umspilinu þegar deildin fer aftur af stað í mars.
Athugasemdir
