Hvet alla til þess að mæta á Wurth-völlinn Það er hreinlega geggjað veður til þess að horfa á fótbolta. Heiðskýrt, sól og hlýtt úti.

Byrjunarliðin komin Rúnar Páll gerir fjórar breytingar frá síðasta leik sem var jafntefli á móti Fram. Ásgeir Eyþórsson, Pétur Bjarna, Þórður Gunnar, Birkir Eyþórsson koma allir inn í byrjunarliðið. Unnar Steinn Ingvarsson, Arnór Gauti, Benedikt Daríus og Ómar Björn setjast allir á bekkinn.

Jökull Elísabetarson gerir tvær breytingar frá sigrinum á ÍBV. Eggert Aron Guðmundsson og Helgi Fróði Ingason koma í byrjunarliðið í stað Andra Adolphssonar og Róberts Frosta Þorkelssonar

Dómaratríóið Málarameistarinn er sterkur á penslinum en ógnargóður með flautuna. Erlendur Eiríksson er konsertmeistari kvöldsins.
Honum til aðstoðar eru þeir Eðvarð Eðvarðsson sem AD1 og Sveinn Ingi Sigurjónsson Waage sem AD2. Eftirlitsmaður er svo Þórður Ingi Guðjónsson

Síðasta umferð liðanna Fylkismenn fóru í Dal draumanna í heimsókn til Fram og gerðu þar 1 - 1 jafntefli. Stjörnumenn gerðu sér hinsvegar far á Þjóðhátíð í Vestmannaeyjum. Spiluðu reyndar knattspyrnuleik þar og gerðu 0 - 2 sigur á Eyjamönnum.

Viðbót við fyrri sögustund Snillingurinn Óskar Ófeigur á Vísi.is skrifaði grein í dag um þá staðreynd að Fylkismenn hafi ekki unnið Stjörnuna í efstu deild í yfir áratug. En síðasti sigur þeirra kom 7. ágúst 2013. Fyrri leikur liðanna í sumar endaði sem 2 - 2 jafntefli.

Liðin hafa spilað 29. innbyrðis leiki í efstu deild. Stjörnumenn hafa unnið 18 þeirra. Fylkismenn hafa unnið 5 og 6 sinnum hafa liðin gert jafntefli.

Nýr leikmaður Stjörnunnar, þó ekki með í dag Eins og tilkynnt var í morgun að þá voru Stjörnumenn að styrkja lið sitt, en til liðs við þá gekk danski miðvörðurinn Kristian Riis.

Jökull Elísabetarson þjálfari Stjörnunnar sem og Kristian tjáðu sig í tilkynningu frá Stjörnunni um vistaskiptin. Leikheimild hans tekur gildi á morgun og er hann því ekki gjaldgengur í liði Stjörnunnar í kvöld

Staðan Fylkismenn eru að berjast í neðri hluta deildarinnar og eru með 17. stig. Tveimur sætum frá 11. sætinu með tveggja stiga forskot á Fram fyrir leikinn í dag, gætu aukið það í fimm stig með sigri í dag.

Stjörnumenn eru svo sannarlega á flugi og sitja í 6.sæti deildarinnar með 25.stig og gætu komist í 28.stig og náð fjórða sætinu af KR með sigri í dag. Stjörnumenn hafa ekki tapað leik í fimm leikjum í röð.

Smá sögustund Rúnar Páll Sigmundsson þjálfari Fylkis er eins og allir vita fyrrum þjálfari Stjörnunnar, þjálfaði þá lengi og gerði m.a. að Íslandsmeisturum. Í liði Fylkis er svo líka að sjálfsögðu Ólafur Karl Finsen sem er uppalinn Stjörnumaður og spilaði lengi með þeim.

Velkomin í lautina Klukkan 19:15 hefst lokaleikur 19. umferðar Bestu deildar karla í knattspyrnu þegar heimamenn í Fylki taka á móti sjóðheitum Stjörnumönnum. Hlakka til að fylgja ykkur í leik sem vonandi verður eintóm skemmtun.