Liðin eru nú að ganga inn á völlinn, rúmar tvær mínútur í leik.

Nú styttist í að leikurinn hefjist og er fólk að streyma inn í stúkuna, meðal vallargesta er yngri flokka þjálfarinn knái Kristján Gylfi Guðmundsson sem er mikill Fylkismaður og þjálfar yngri flokka hjá félaginu, hann mætir á alla leiki.

Byrjunarliðin eru komin inn.

Fylkismenn gera tvær breytingar á liði sínu frá tapinu í Garðabæ í síðustu umferð. Fyrirliðinn Ragnar Bragi Sveinsson er kinnbeinsbrotinn og svo fer Þórður Gunnar Hafþórsson á bekkinn. Hákon Ingi Jónsson og Birkir Eyþórsson byrja í stað þeirra.

Breiðablik gerir eina breytingu frá sigrinum á Gróttu í fyrstu umferðinni. Guðjón Pétur Lýðsson byrjar inn á í stað Olivers Sigurjónssonar.

Bæði þessi lið skiptu um þjálfara eftir síðustu leiktíð.
Helgi Sigurðsson sem hafði þjálfað Fylkismenn í þrjú ár yfirgaf félagið og tók við ÍBV á meðan Ágúst Gylfason sem hafði þjálfað Blikana í tvö ár tók við nýliðum Gróttu.

Fylkismenn eru að vinna með nýja stefnu hjá sér þar sem eru tveir aðalþjálfarar. Atli Sveinn Þórarinsson tók við liðinu ásamt Ólafi Stígssyni sem hafði verið aðstoðarmaður Helga undanfarin ár. Atli hefur litla reynslu í meistaraflokks þjálfun en hann þjálfaði Dalvík/Reyni árið 2016 í þriðju deildinni og hafði síðan verið yfirþjálfari yngri flokka Stjörnunnar undanfarin ár.

Óskar Hrafn fór með Gróttu upp um tvær deildir á tveimur árum áður en hann tók við Blikunum síðasta haust. Óskar sem hafði lengi starfað í fjölmiðlum hafði ekki þjálfað meistaraflokk fyrr en hann tók við Gróttu en hann var valinn þjálfari ársins á Íslandi fyrir síðasta ár. Óskar er að spila athyglisverðan fótbolta en hann sagði m.a. að honum finnst lífið of stutt fyrir leiðinlegan fótbolta og miðað við fyrsta leik hjá Blikunum verða ekki margir leiðinlegir leikir hjá Kópavogsliðinu.

Það er mjög gott veður hér í dag, 20 stiga hiti og sól. Fólk ætti að hópast á völlinn í þessari blíðu!

Breiðablik vann afar sannfærandi 3-0 sigur á Gróttu á heimavelli í fyrstu umferð deildarinnar og var spilamennska þeirra afar sannfærandi. Þeir hefðu getað skorað mun fleiri mörk og ef þeir spila jafn vel í dag mun dagurinn vera erfiður fyrir Fylkismenn.

Í fyrstu umferð tapaði Fylkir 2-1 fyrir Stjörnunni eftir að hafa komist yfir á fyrstu mínútu leiksins. Stjörnumenn voru töluvert betri en Fylkismenn í leiknum og ljóst að Fylkir verða að spila miklu betur hér í dag ætli þeir að vinna leikinn. Ólafur Ingi Skúlason spilandi aðstoðarþjálfari Fylkis er í leikbanni eftir að hafa fengið beint rautt spjald fyrir groddaralega tæklingu á Alexi Þór Haukssyni og þá er fyrirliðinn Ragnar Bragi Sveinsson kinnbeinsbrotinn og verður frá næstu vikurnar.

Góða kvöldið og verið velkomin í beina textalýsingu frá leik Fylkis og Breiðabliks í Pepsí Max-deild karla hér á Wurth vellinum.