SKÝRSLAN: Fyrsti sigur FH í rúman mánuð
Hvað réði úrslitum?
Færanýtingin. Grindvíkingar höfðu brennt af góðum færum áður en Steven Lennon skoraði með þrumuskoti eftir flotta sókn. Eftir það náðu FH-ingar að vera þéttari í vörninni og sigla mikilvægum sigri í höfn.
Bestu leikmenn
1. Gunnar Nielsen (FH)
Færeyingurinn var öryggið uppmálað í öllum sínum aðgerðum og átti góðar vörslur. Kemur öflugur heim úr landsliðsverkefni með Færeyjum.
2. Steven Lennon (FH)
Skoraði markið mikilvæga og ógnaði mest af sóknarmönnum FH í leiknum.
Atvikið
Sigurmarkið hjá Lennon. Grindvíkingar höfðu verið ógnandi en FH-ingar vöknuðu betur til lífsins eftir markið. Lennon afgreiddi færið líka fagmannlega. Hans tólfta mark í Pepsi-deildinni í sumar.
Hvað þýða úrslitin?
FH hoppaði upp í 3. sætið með sigrinum. Liðið er tveimur stigum á undan KR og þremur á undan Grindavík sem er í 5. sæti. Þrjú stig eru í Stjörnuna í 2. sæti en FH á leik til góða á öll þessi lið.
Vondur dagur
Will Daniels var mjög duglegur á kantinum hjá Grindavík í leiknum. Hann kom sér í nokkur góð færi í fyrri hálfleiknum en afgreiðslurnar voru mjög slakar. Eitthvað sem hann getur verið mjög ósáttur með.
Dómarinn - 6
Engir stórir dómar rangir hjá Ívari en nokkrir minni dómar sem vöktu furðu.