SKÝRSLAN: Keflvíkingar með níu fingur á Pepsi Max dósinni
Hvað réði úrslitum?
Haukakonur byrjuðu leikinn betur en um leið og Keflavíkurkonur skora rétt fyrir hálfleik, þá var ekki aftur snúið. Vindurinn hafði sitt að segja og fyrst Haukar náðu ekki að skora með hann í bakið þá var nánast öll von úti í seinni hálfleik.
Bestu leikmenn
1. Paula Isabelle Germino Watnick
Markaskorari dagsins. Hlaupin hennar eru alltaf jafn hættuleg og hún refsaði um leið og Haukakonur sofnuðu á verðinum.
2. Natasha Moora Anasi
Átti stóran þátt í eina marki leiksins og gerði tilkall til vítaspyrnu.
Atvikið
Eina mark leiksins fær nafnbótina atvik leiksins. Keflavík rankaði ekki við sér þar til seint í fyrri hálfleik. Natasha stelur boltanum í uppspili Hauka og gerir vel í að koma honum á Paulu sem átti frábært hlaup og potar honum yfir línuna rétt fyrir hálfleik.
Hvað þýða úrslitin?
Keflavíkurkonur eru komnar langleiðina með að tryggja sig upp í deild hinna bestu þar sem þær komust 7 stigum fyrir ofan Haukakonur með þessum sigri í dag.
Vondur dagur
Haukaliðið í heild sinni. Spila í leiðinlegu veðri, tapa naumlega og gera nánast út um vonir sínar um sæti í efstu deild með þessari ferð suður með sjó.
Dómarinn - 6
Helst til of latur að flauta í flautuna og sleppti nokkrum dómum. Langflestir hefðu dæmt vítaspyrnu þegar Natöshu var hrint í teignum í seinni hálfleik.